每次去親海外車展都好似尋寶咁，唔知會有幾多重驚喜。正如剛於昨日舉行完嘅東京改裝車展（TokyoAutoSalon2005），570部改裝車（主要源自日本）一併展出，最印象深刻嘅，除咗有唯一嘅香港代表富利堡加入戰團外，場內數之不盡的Showgirl，長腿低胸短裙樣樣齊，驚喜？一個接一個啦！
記者、攝影：朱維達
位處千葉縣千葉市的國際展示場共設有三個場館，場內的改裝車天花龍鳳，部份改到不切實際，但可觀性一絕；原本在香港大行其道嘅實用型MPV/SUV，就變得更加靚仔，展場就好似一個大型夢工場，名副其實係另類DreamCarShow！
Alphard豪過坐商務客位
唯一嘅香港代表富利堡，旗下派出全球首部LexusLS430長陣版、可防彈Maybach57及豐田嘅Alphard，最多人圍觀嘅始終係Alphard，她勝不在外表，而係豪過商務座艙嘅內櫳，26"LCD電視已經大過我屋企嗰部，紅酒櫃、按摩真皮座椅、雙重隔音玻璃、防襲擊警報，相信係人都會諗：「嘩！使唔使咁豪呀？！」
MuranoSportsResetting加大版跑車
相信大家仍記得本報早前曾對呢部Murano作過外地測試，今次呢部標價3,759,000日圓的Murano，一睇個樣就知唔同晒啦！泵把、電鍍尾翼、18"合金胎軨全部唔同，而最大分別係個扮跑look嘅車花，對雙出尾喉爆發時重超靜呢！
PremacyActiveCustomize
旅行大霸王
講到MPV，最實用莫過於呢部Premacy，普通版座艙已經夠闊落，車頂重加上行李箱，配合車尾摺合式簾篷，就地野餐，完全係戶外能手。
LancerEvolution終極變身
如果你覺得05年初嘅三菱LancerRalliart已經夠型咁就錯啦！呢間為Colt同Evolution改裝嘅商舖，將部Evolution執得更型仔，唔計嗰個超潮爆嘅車頭通風槽，淨係個凸點形導風裝置已好另類，加裝埋油溫壓表板（95,000日圓）、18"原裝R-01胎軨（72,450日圓）、電鍍同色門燈（56,175日圓），去到旺角重唔威盡？
Alfa147GTA焦點大移位？
日本改裝車好多細微部件都會由不同改裝商分工承擔，好似由IPF改裝商改裝的三門愛快，無論頭尾燈都經過精心改良，前者配合包邊，後者則裝上圓形LED燈加強照射效果，不過公司請呢位model做promote，似乎會喧賓奪主喎！
LegendMax熱情如火
若果你嫌Evolution太後生，但又鍾意速度感嘅成熟穩重型，呢部Legend就要埋嚟睇睇，除咗有Evolution一樣嘅車頭通風槽裝置，最型就係個尾翼，上面睇係跟車身相同嘅火辣紅色，下面睇襯埋頭燈、通風槽、車胎軨顏色，呢啲咪叫做襯到絕囉！
SwiftSport家庭式小跑
最新嘅Swift已經有改裝版，三組圓形頭燈組合、前排凹凸形跑桶、車身髹上新式花邊，車尾電鍍大尾翼、雙式通風閘，原本是一部斯斯文文嘅小型家庭車，搖身一變加入小跑行列，重聞到陣GolfGTi味㖭！
GinoMinilite小變化大改善
一般都覺得Gino車仔細細馬力又不算突出，好難引到旁人注視，但簡單嘅車花配合一套簡單嘅包圍已經好突出，白色裙腳連大型鬼面罩，拉埋條好似的士feel嘅車花，毋須太過花巧已造出另類效果！
三大怪車現身！
全身銀色兼鷗翼已經搶盡風頭，座艙重有三部芒同一個後置大喇叭，使唔使咁誇呀？
