周星馳套《功夫》上畫一個月，票房大約收咗五千六百幾萬，不過佢想破《少林足球》嘅六千萬票房紀錄，相信重要等多一個禮拜，而全亞洲嘅票房，更已經過咗一億美元（約七億八千萬港元）嘅大關，實在值得慶賀。為咗全力催谷《功》片，星爺今晚會上商台接受陶傑主持嘅《光明頂》訪問，到時連政務司司長曾蔭權都會上節目，同星爺一齊交流意見，唔知佢有冇睇《功夫》套戲呢？馮仁昭對三位猛人會師好有興趣，期待會擦出火花。
另外，由聽日開始，觀眾只要保留《功夫》戲票尾就有機會出席呢個月三十日喺奧海城舉行嘅「功夫大喜慶」活動，到時觀眾除咗可以同星爺一齊勁擦一餐外，星爺重會向現場嘅觀眾派禮物，想同星爺見面就唔好錯過呢個機會。
鄧萃雯噚日喺柴灣為代言嘅護膚食品拍廣告，雯女喺十零度嘅溫度下，都只係着咗件小背心出席活動，廣告商都好識做咁喺現場放暖爐費事佢冷病。雯女話呢個係佢○五年嘅第一個廣告，之後重會為代言嘅纖體公司拍多個廣告，佢笑話：「其實我本來唔係好貪靚，但接咗呢啲廣告，你唔想都要變到好靚，自自然然搞到我愈嚟愈貪靚。」
任賢齊噚日喺元朗出席簽唱會，歌迷捐出八十蚊就可以得到一張CD同一個簽名證，而善款會捐畀紅十字會。現場除咗有三百幾人排隊等簽名外，亦吸引咗五百幾人圍觀，場面相當熱鬧。小齊話雖然呢日第一次嚟元朗，但就知最出名係老婆餅，所以都會去買嚟食吓。有記者問佢幾時會娶老婆，佢話：「要時間諗吓！」然後就扯開咗話題。
向海嵐同江欣燕噚日為一間水晶店剪綵，向海嵐話自己一向都相信水晶嘅力量，佢話：「屋企有好多水晶，但通常都係有助事業為主。」問向海嵐有冇收藏旺桃花嘅粉紅晶？佢就話：「個個藝人都想有多啲人緣，多桃花亦即係有利工作。」
林雅詩出嫁在即，佢噚日就同未婚夫溫文英去咗九龍塘影結婚相。婚後準備做少奶奶嘅阿詩，𠵱家已經開始增肥，佢話諗住生個肥肥白白嘅BB，但係兩口子意見分歧，阿詩就鍾意男仔，但老公就鍾意女仔，阿詩重話生個女如果唔聽話，都會照樣對佢實行體罰喎！
