上周除咗澳門賭業股個別放煙花外，大市其實好悶蛋。經紀黃話，唔少經紀好似佢咁，比較保守及錫住客仔，都唔會建議客仔炒賣濠賭股，寧願賺少啲佣金，好過冇咗個有實力嘅客。
經紀黃又話，工業股喺04年沉寂多時，應該有機會在今年抬頭，原因係原材料如鋼材塑料價格高企問題，今年將可望紓緩，有利工業股發展，鐘表生產商宜進利（304）係今年心水之選。
宜進利以往炒味濃厚，但近年已經大幅改善，除獲外資大行垂青，發表報告推介外，並為公司配股引入基金做股東。至於公司本身亦好爭氣，以較早前公布截至去年9月底止的中期業績為例，純利增加69%至5791萬元。
有間美資行今明兩日在星洲搞路演，推介多家本港中小型企業，其中宜進利亦榜上有名，隻股靜咗咁耐，有望在路演過後，再獲芬佬注視。
宜進利上周五冇起跌，平收1.57元。
慕容小初