日本巨胸女星小池榮子向來迷倒唔少男士，原來日本攝影大師篠山紀信四年前初次同榮子合作為雜誌《FlashExciting》拍攝封面同專輯寫真嗰陣，佢已經對呢位靚女印象深刻，更認為榮子充滿意大利女星安妮塔艾格賓（AnitaEkberg）嘅魅力，所以構思兩年之後，就搵榮子拍攝全新寫真集《digi+KISHIN小池榮子》。
篠山話：「嗰陣榮子嘅知名度雖然冇𠵱家咁勁，但我已經覺得佢嘅肉體充滿咗官能刺激，之後我一直好想同佢拍攝一本更加出色嘅寫真集。」
篠山更加認為，榮子骨子裏散發住意大利女星安妮塔艾格賓喺電影大師費里尼（FedericoFellini）代表作《甜蜜生活》入面嘅味道，同樣高貴與妖豔並重，所以喺寫真集入面刻意突出呢方面嘅感覺。
篠山知道榮子已經拍過唔少水着寫真，所以今次盡量要榮子打扮得較為成熟同高貴，佢重話：「因為榮子比較忙，我同佢用咗幾日由早到晚拍攝，甚至由深夜拍到天光，反而拍出其他攝影師同fans都未見過嘅榮子！」