臨近新年，好多人都趁機將屋企家具，所有杯碟、碗筷統統換過晒，等親友嚟拜年時唔會失禮！但換時換，唔好唔記得換埋其他配件，乜嘢配件？之唔係枱布、餐墊同杯墊，家陣先發現清單欠缺呢三樣？無問題，即時為各位送上多款推介，先預覽後入貨都唔遲！
記者：黃婉冰 攝影：陳陶鈞、蔡鴻雯
ImageGirl：Crystal
精美餐墊美化餐枱
近年愈來愈多人鍾意買餐墊代替即棄膠枱布，一來環保，二來一塊款式精美的餐墊，亦可用來美化餐枱，中、西、摩登、懷舊多種花款及質料任你揀！
「叉」多眼亂
枱墊畫滿一隻又一隻的叉圖案，款式較有玩味。黑、白、透明真正係「乜叉」都有，叉多眼亂，食意粉時千祈唔好攞錯！100%棉料，可用機洗。
售價：$55(h)
繡花餐墊連筷子套裝
紅噹噹中式餐墊，過年用夠晒喜氣洋洋。餐墊質料為織錦，上面繡滿金龍，好意頭又夠應節。一套有六塊餐墊，另有六對中式筷子及繡花餐巾，款式高貴又得體。
售價：$338/套(a)
懷舊波浪紋
時下興玩懷舊Feel，連餐墊都唔執輸玩埋一份。深淺色重叠效果加波浪圖案，懷舊感十足，有無少少花樣年華的感覺？棉布質料，用到污糟可以放入洗衣機清洗。
售價：$38(c)
熱帶風情蕉葉墊
SOARE蕉葉餐墊，全張以蕉葉織製而成，即使在寒冬季節，同樣令人聯想到陣陣亞熱帶風情。蕉葉漆上光油，防水防污，用濕布一抹即可，勁厚身，墊熱辣辣碗碟一樣掂。
售價：$25(b)
好彩定唔好彩？
人有三衰六旺，豬都有好彩同唔好彩。睇呢張餐墊就知喇，有豬歡笑有豬愁，就同上面寫住嘅一樣，LuckyorUnlucky？但無所謂，得意就得喇！
售價：$30(h)
織格膠墊玩層次
想易打理又要有特色，這款織格膠墊就同時符合以上兩個要求。餐墊以軟膠條編織而成，織格效果有層次感，軟膠質料防水又易清潔。
售價：$80/塊(f)
簡約撞色間條
以不同粗幼條子襯出漸變效果，款式簡單又富現代感。顏色較沉實，用來襯原木色餐枱最適合，厚身棉布質料，清洗容易又耐用。
原價：$160/2張
特價：$80/2張(f)
暖笠笠棉×羊毛
質料以棉料混合羊毛製成，摸上手又軟又滑，餐墊上有兩隻的骰小鳥作點綴。有佢將熱湯同凍冰冰嘅枱面分隔開，零舍暖笠笠！
售價：$55(h)
新款杯墊興玩質料圖案
雖說杯墊的用途只係用來墊杯，但若然連個杯墊都靚過人，相信客人飲茶都飲得較賞心悅目。想買個靚杯墊？唔難，隨手拈來都可以有多款不同質料、款式任你揀，只怕花多眼亂唔知揀邊個好！
型格玻璃墊
玻璃杯墊畫上簡約而又Colorful的正方形圖案，甚富藝術色彩。杯墊底有防跣膠粒，玻璃質料容易清潔，附有木座擺放，便於收藏，一套四個。
售價：$189/套(g)
矜貴真絲繡花
論款式夠大方得體，這款中式真絲繡花杯墊會是不錯的選擇。以真絲做成的杯墊，加上細緻繡花圖案，矜貴又大體，備有多種不同顏色及圖案選擇。
售價：$58/個(a)
香草杯墊
圖案帶點民族風格的布杯墊，會發出陣陣清新香草味。全因每個布杯墊內都填入香草種籽，香草味更有殺蟎作用，可避免布料滋生細菌，一套四個。
售價：$129/套(g)
潮玩DesignerChair
銀両有限買唔到DesignerChair，買呢套杯墊望吓都好！百零蚊可以一次過畀你欣賞四張潮椅，計落化算好多。杯墊底部四個角都有防跣膠粒，夠晒細心！
售價：$169/套(d)
罕有繡花棉杯墊
較少見的棉布杯墊，重有埋十字針步繡花，個款夠晒煞食，重好有HandmadeFeel。棉布質料軟滑柔順，望見已有一種暖笠笠的感覺！
售價：$35/個(h)
耐用不銹鋼
講求實際，這套GROOGT杯墊完全符合要求。不銹鋼杯墊，耐用又易清潔，簡單平面圖案設計唔怕藏污迹，一抹就搞掂，有埋不銹鋼座，方便存取。
售價：$39/套(b)
時尚簡約十字花
要平、靚、正、耐用、輕巧、易清潔，集合以上各種要求，誠推這款十字花布杯墊。彩色十字Pattern，簡約又夠Stylish，重有多款顏色任揀，值得考慮！
售價：$12/個(c)
浮游ABC
嫌Pattern或繡花太呆板未見特別？呢款水杯墊肯定滿足到你，杯墊內有多個彩色ABC字母浮游，設計夠晒另類，最啱不甘於平凡的人。
售價：$32/個(c)
改良版枱布款靚易清潔
屋企有張玻璃或雲石枱，唔想郁啲就刮花，鋪塊大枱布就最適合。枱布可以保護枱面之外，更有點綴家居的作用，加上市面新款的枱布，已改良到又靚又易清潔，稱得上好「洗」好用！
圓點波浪夠花巧
尺寸：長100×闊100cm
印滿圓點波浪圖案，顏色帶少少懷舊味道，最啱襯部屋。另有紅色同藍色供選擇，棉布質料可用機洗，啱晒後生仔女！
售價：$125(h)
喱士膠枱布夠美觀
尺寸：長110×闊140cm
就算鋪膠枱布都可以有Elegant效果，好似呢款樹葉圖案膠枱布，枱布四周車上喱士花邊，效果比普通款式美觀大體得多，用毛巾一抹就乾淨，方便又襟睇。
原價：$200
特價：$160(e)
帆船圖案細路至愛
尺寸：長100×闊100cm
童心未泯或是家有小孩，呢款印滿帆船的膠枱布會是首選。枱布畫滿小帆船，小朋友見到實鍾意，就算大人用亦唔怕幼稚，膠面用濕布一抹便可清潔乾淨。
原價：$145
特價：$72.5(h)
再生原料夠環保
尺寸：長145×闊220cm
VINDERUTA全棉枱布，布料為再生原料，合乎環保意識，枱布Size適合4-6人枱使用，布料質地頗厚，而且可以機洗，耐用又美觀。
售價：$159(b)
售賣點
(a) 彩綾殿 28338338 銅鑼灣軒尼詩道555號崇光百貨8樓
(b) 宜家傢俬 31250888 銅鑼灣告士打道310號柏寧酒店高層地庫
(c) Francfranc 31068958 九龍塘又一城G27號舖
(d) aluminium 25774066 灣仔皇后大道東58-64號F舖地下及地庫
(e) 崇光百貨 28338338 銅鑼灣軒尼詩道555號
(f) Villeroy&Boch 28314636 銅鑼灣軒尼詩道555號崇光百貨7樓
(g) 斗室 29158132 上環荷李活道123號荷李活華庭3號舖
(h) Log-On 22655333 九龍塘又一城UG層01號舖