「拖手未必係拍拖！」
霍震霆拒承認郭晶晶、霍啟剛關係

奧運金牌跳水公主郭晶晶與全國政協副主席霍英東的長孫霍啟剛戀情白熱化，更被拍得公開拖手。但「未來老爺」霍震霆則似對兒子戀情有所保留，他直言：「拖手未必係拍拖！」

跳水公主郭晶晶與霍英東的長孫霍啟剛去年九月在上海傳出緋聞，雖曾由新華社罕有地發聲明否認，但兩人戀情卻逐漸地面化，先有報道指二人同赴北京，去年底又被拍到於淺水灣撐枱腳。日前郭晶晶來港會男友兼理髮被發現，霍啟剛挺身護花，公開十指緊扣拖實郭晶晶，更獲霍母朱玲玲安排座駕離去。

「我睇報紙先知」
霍啟剛父親霍震霆昨日在香港仔球場為「女童軍名人慈善競技」任主禮嘉賓，未知是否受兩名兒子的緋聞困擾，霍震霆前額添上不少白髮，一身紅色運動服令白髮更為礙眼。對於兒子啟剛與郭晶晶公然拖手，霍震霆說：「細路仔嘅事，你哋唔好問我啦，𠵱家傳媒咁發達，我都係睇報紙先知。」
問霍震霆是否贊成二人拍拖？他說：「佢又唔係咁細。」問他對未來媳婦有何要求？他說：「唔好咁快講呢啲啦。」記者提到朱玲玲出動私人Benz接送兒子及郭晶晶離開現場，似默許了兒子戀情，霍震霆即時說：「私人嘢唔想再講喇，講吓體育啦，今日支持吓運動。」隨即轉與工作人員及其他嘉賓交談。

「佢自己識發展」
其後，記者再三追問，霍震霆無奈地回應說：「佢二十幾歲仔，自己識發展㗎喇！」問霍震霆啟剛有否帶女友晶晶與他見面？他說：「𠵱家資訊好發達，睇報紙就得。」之後他續說：「我唔係一個嚴父，拖手仔係外國禮儀，影到都未必係拍拖㗎！」言語間似有保留，看來郭晶晶想效法師姐伏明霞嫁入豪門，先要努力打通與未來老爺的關係。
採訪、攝影：梁錦雯