特首董建華成日俾市民叫佢落台，董家三小姐董建平（圖）噚日接受香港電台訪問，就爆咗大佬任勞任怨，唔輕言放棄嘅原因，佢重話冇聽過大佬呻話唔做特首㖭。
董建平首先講到大佬喺最新一份施政報告查找不足認錯嘅事，佢形容董建華咁寫「好誠實、好厚道」，至於自己有乜感想，佢就欲語還休唔肯多講，但強調父親董浩雲一向對董建華期望好高，董建華能夠做首任香港特首，相信父親泉下有知都會感到驕傲。
董建平又透露父親對大佬管教甚嚴，希望訓練大仔繼承東方海外，因此只畀好少零用錢佢使，而且要記低啲錢用喺邊。佢又話八、九十年代東方海外陷入財政危機，其中一個原因係父親一味想搞大間公司，結果擴張過度令接手嘅董建華非常難做，但經此一役卻令董建華更堅毅面對困難，亦培養出任勞任怨，唔輕言放棄嘅性格，所以就算外界諸多批評，佢都冇聽過大佬呻話唔做特首，「佢已堅持咁多年，重有兩年半啫。」
董建華有時面對記者顯得口齒唔多伶俐，董建平為大佬平反，澄清其實董建華口才好好，有時講嘢唔清楚，可能同上海人講唔慣廣東話有關，因為喺屋企佢哋多數講上海話，講英文時候亦較多，所以董建華講英文流利過講廣東話。
董建平喺中環開畫廊二十幾年，佢話近年先明白當年父親帶佢周遊列國參觀藝術館嘅苦心，唔係咁佢亦唔會培養出藝術品味，佢笑言唔少朋友好想老婆學似佢咁，使一、二千蚊買幅畫，可以顯示自己品味，好過一萬蚊買件名牌衫啦。
傳真︰2623-9278
電郵︰