董特首嘅施政報告，以扶貧、文化及創意工業為主角，其餘無甚足觀。即使創意工業都係翻炒舊橋啫，文化委員會未解散之前，在二○○三年一月遞交嘅最後報告，提過㗎嘞，文化委員會已消失到無影無蹤，𠵱家舊事重提，可見董先生做事慢幾拍。
董特首好關心增加就業，希望減低失業率。科大雷鼎鳴教授就大潑冷水，發表經濟預測報告話失業率可能止跌回升，上番百分之七點五嘅水平。雷教授喺○三年十月預測失業率下跌至百分之七以下就好難再降低，果然失業率到咗百分之六點七就郁都唔郁，靈過鬼。假如雷教授呢次預測又中，特首講乜嘢政策都冇用，啲左派大聯盟（泛指民建聯、民主黨、前綫、街工、職工盟、工聯會等要求最低工資、最高工時嘅議員）一定唔肯過佢，到時再一齊聯手施壓，要求成立最低工資制度。
特首今年側側膊，喺施政報告第三十三段講得甚為軟弱，佢話：「我們要通過客觀分析和理性討論，尋求共識；同時也要充份評估各項措施實行起來對僱員是否會真正有利，而不是適得其反。政府會以開放的態度，聽取社會各界的意見。勞工顧問委員會是社會公認、行之有效的勞工事務三方協商機制，他們已經開始討論這個課題，並會展開深入研究。」
講來講去，特首唔敢一口拒絕實行最低工資制。一月十三日立法會答問大會上，李卓人議員追問，特首含糊其辭，冇厘氣勢，失咗一個好好發揮嘅機會。雷鼎鳴教授話明最低工資制會提高失業率，對工人不利，點解特首事先唔請教吓啲經濟學家攞定modelanswer啫？佢嘅智囊劉兆佳係社會學家，唔識經濟學嘅，問吓政府經濟顧問郭國全都好吖！