上星期去了外地睇景，朋友問我：「景做乜要睇呀？睇相咪得囉！」另外一啲朋友又會覺得：「你就好啦，成日可以去旅行。」或者「嗰啲地方你都敢去？好危險喎！」七嘴八舌下，我都唔知點同佢哋解釋。當然睇景完全唔係我啲朋友想像中嘅事，其實幾有趣。
你去過幾多個陌生人屋企？我去過幾百個。咁如果你係好鍾意隨便跟陌生人返屋企唔知搞啲乜，又或者你興趣係睇啲有人住緊嘅二手樓而數量上多過我，我輸畀你。
我冇咁勁去過幾百個陌生人屋企唔知搞啲乜，興趣亦都唔係睇樓，我在製作人員安排下去一個完全唔識啲人嘅屋企，可以唔同佢打招呼，睇完後可以一句嘢都唔講，我覺得好好玩，因為可以窺探不同階層人士嘅生活習慣。
對人物角色創作有好大幫助。
老實講我都想好似我啲朋友嘅幻想咁可以睇咗張相就決定去邊度拍戲，又或者係唔知點解，總之揀個想去旅行嘅地方去拍套戲啦。我做副導演嘅時候真係見過有人打開個世界地圖，指着一個國家：「呢度我未去過，就去呢度拍戲啦。」咁當然呢個係個有力人士啦，不過真係幾搞笑，如果係拍寰宇風情呢類型節目我就明，但係𠵱家係拍電影喎，唔係應該按故事需要選擇適當地點去拍攝咩？除非佢當自己拍緊嗰部戲叫寰宇風情啦。
我覺得自己好幸運，經常可以去一啲旅行一定唔會去嘅地方，了解唔同人嘅生活，不過唔係次次都咁好玩，例如係我𠵱家喺一個零下十度嘅地方睇緊外景，要睇多五日至可以返屋企。