海關大發神威，前幾天拘捕了一名非法發布電影檔案的失業漢，神威之處在於因為這是全球首個成功對付P2P非法下載的大件事。香港執法部門好勁，連星爺都讚好！
「嘩，灣仔電腦商場啲老翻呢兩日開番啦，快啲去掃貨。」
「你知唔知，我搵得好辛苦先搵到呢隻software嘅crack版，勁唔勁？」
大家可能有聽過甚至講過這些說話。沒辦法了，幾年前的香港遍地老翻，當時根本沒有人會買正版軟件、CD和VCD。你買正版Window，我當你是怪獸！
無可否認，「買正版是怪獸」的侵權文化，在今時今日的香港的確已有些少改善。可惜，正因為政府大力執法，老翻已不是隨處可見，因此現今有「找到老翻才醒目」之新看法抬頭。
一次，朋友A拿着新買的iBook笑着對我說：「你睇吓，我有個朋友幫我裝了很多軟件。」我看看，老翻軟件多到不得了，我話：「嘩，你啲軟件加埋可能值成30萬！單是隻FinalCutPro都要成萬幾啦！」朋友A笑得更自豪，我苦笑。
另一次，朋友B在聖誕抽到一部SlimPS2做獎品：「你可唔可以借啲碟畀我玩啊？」我答：「當然冇問題。」「不過，我冇改機喎，唔知玩唔玩到？」「對唔住，就係咁先玩到，因為我啲game全部都係正版。」我這個朋友B，月入過4萬，他居然話：「……正版咁貴，你都會買？」價錢再便宜、執法再大力，也不及政府教育大眾對知識產權有正確的認知。風氣是可以相互影響感染的，一齊創造「用正版先有型」的新文化！