鍾欣桐與蔡卓妍自組Twins後，二人在三年多以來的出碟、拍電影及拍廣告數量之多，實屬全港藝人之冠，在港早已名利雙收，故Twins在上月尾已開始往台北灌錄處女國語碟，待三月出碟時，將正式挑戰寶島人氣三人組S.H.E。
Twins對此卻說：「唔可以話係挑戰嘅，S.H.E喺台灣咁受歡迎，佢哋係台灣地膽，都好想向佢哋學習。」
不過，提起在台的日子，阿嬌即忍不住說：「我諗住請啲同事過嚟台灣慶祝生日（本月二十一日），之前我去過台灣幾次，好似坐監咁唔畀出街，我到𠵱家都未去過誠品（台灣二十四小時連鎖書店），我問過Mani（經理人霍汶希），佢唔會畀我哋出街，生日就破例。不過我都知公司係驚我哋人生路不熟，唔想有危險同節外生枝啫。」
Twins日忙夜忙，要賠上大量私人時間與健康，去年阿Sa更數度入院，故她也希望踏入新一年，自己能有良好體魄。
阿Sa說：「係一個天秤嚟嘅，一邊重咗，另一邊就輕咗，放咁多精神時間喺工作上，一定有啲嘢係冇咗嘅，我腸胃好差，又鼻敏感，對眼同耳都有影響，我試過睇醫生想斷尾，鼻哥又做過手術，但始終唔夠休息，香港空氣又好差，啲病好一段時間又番嚟。」
未知阿Sa會否考慮向公司申請放假，好好休息調養身體？她說：「盡量啦，其實公司一有期都會畀我哋放假，我哋出道頭三年不停咁衝，搏命做嘢，但𠵱家啲新人，好似Fiona（薛凱琪）咁又係咁搏命做嘢，太多人啦，唔勤力就一定冇，所以要搏命囉。」
阿Sa又表示至今也沒想過Twins拆夥作獨立發展，她說：「𠵱家都未得，重要打埋國語碟嘅市場，可能要三、四年後至分開做嘢，我都唔知要衝到幾時，不過突然之間唔做又未定，可能真係好想唞吓，就會離開大家，當然都要諗啲責任問題嘅。」
問阿Sa是否有意暫停工作進修增值？她就覺得Twins的確有需要這樣做，問題是能否騰出時間，她說：「個人不停output（輸出），係需要input（輸入）一啲嘢，暫時就未有時間囉。」