自從鄧家爭產事件告一段落後，鄧兆尊同佢班弟妹，甚至祥嫂都低調咗好多，噚日兆尊胞弟鄧兆榮娶老婆，佢同新婚太太區嘉儀喺中環大會堂註冊，夜晚就喺灣仔君悅酒店擺酒，筵開四十幾席，由兆尊同女方父親擔任主婚人，而小艾（鄧翠玉）同妹妹鄧碧玉都有到場觀禮，場面都幾熱鬧。
冇見好耐嘅小艾，抱住個兩歲幾嘅仔嚟到，但佢老公釣魚郎就唔見影，其實嗰陣兆尊反對小艾同釣魚郎一齊，𠵱家小艾個仔都咁大，所以佢哋幾兄妹都冰釋前嫌，不過祥嫂依然冇現身。馮仁昭就問兆尊有冇請祥嫂嚟參加婚禮，兆尊就話：「點通知？飛鴿傳書呀？大家都知乜嘢事，係都通知珍姐（無綫高層曾勵珍）先啦，其實好多朋友都知，但唔知嚟唔嚟，佢（指祥嫂）都知㗎，但佢唔會嚟囉，佢點會理我哋啫，佢只顧自己嘅生活。」
噚日阮少祥、何婉盈、胡敏珊等都有份做兄弟同姊妹團，現場好多親友一見兆尊就催佢快啲結婚，點知兆尊竟然話：「我唔會住，不過企得喺我側邊嘅都會好穩定，我娶妻求淑女，最緊要大方得體，唔使好靚，最好兩樣都有啦，呢啲可遇不可求。」
另外，祥嫂噚日就冇覆機，唔知係咪太多人打去恭喜佢娶新抱呢？
採訪：卓寶花 攝影：仇志德
朱孝天噚日二十六歲生日，有來自泰國、日本嘅歌迷到咗台灣同佢一齊慶祝，有歌迷邊做木瓜沙律邊跳民族舞；有啲就摺巨型紙鶴嚟祝福偶像。問朱孝天有乜嘢生日願望，佢話：「希望世界別再有災難，世界和平，自己、親友和歌迷都身體健康。」
蕭薔啱啱推出咗新唱片《Bella》，佢噚日喺台灣以性感打扮做宣傳，佢話好緊張歌迷嘅反應喎，又成日上網睇歌迷嘅留言，佢話：「新專輯反應不錯，不少網友說我搶歌手飯碗，我之前出書，網友也曾說我搶作家飯碗。」蕭薔貪靚着短裙，所以着咗兩對絲襪打底，但仍然凍到震，活動完咗即趕去後台飲熱飲保暖。
劉德華今日喺歌迷會所「華仔天地」開倉義賣二手衫嚟幫南亞災民籌款，噚日佢一早就返去歌迷會度執拾衣服，又親自為衣服定價，重揀咗六件佢認為好有紀念價值嘅衣服拍賣，包括佢拍《全職殺手》時着嘅紅色皮衣、攞「世界傑青」時着嘅名牌中式長袍等等。
七年冇正式踏台板嘅南紅，將會喺下個月聯同劉惠鳴及任冰兒喺新光演出《紫釵記》，南紅話平時都有練功保持狀態，所以到時演出應該會有好表現。
據知售票反應熱烈，但係南紅今次只演一場，好多戲迷都要求南紅加場，不過佢就未有考慮。
林子瑄、葉文輝（啤梨）同鄧穎芝噚日去銅鑼灣出席一個有關鼓勵創業嘅活動，林子瑄話佢喺沙士期間同兩個朋友喺銅鑼灣開咗間賣少女衫嘅舖頭，不過經營唔夠一年就關門大吉，重要賠租畀管理公司。佢蝕晒啲積蓄之餘，重差啲同好朋友反面。所以林子瑄話吸取教訓之後，以後都唔再搞生意喎。
