呢幾日澳門賭業股大上大落，小初實在好懷疑究竟重有幾多散戶夠膽跟進，但偏偏就世事難料，傳聞話會搞配股多時的美建集團（335），終於在昨日停牌落實批股。
一如早前傳聞，美建今次係委任歐資行，按每股1.42元，配售2億股，集資2.8億元，投資澳門物業市場。
經紀陳話，據講早排美建曾經在市場上試過盤，但發覺散戶似乎興趣唔大，皆因隻股向來冷門，所以批股一事延遲，但近日個別濠賭股做番好啲，再舊事重提，配股對象據講以芬佬為主。
不過，經紀陳對美建復牌後表現抱猶豫態度，佢話一來美建傳聞的配股價，較停牌前收市價有成17％折讓，二來隻股由1元樓下起步，在好短時間內抽上，所以抱有戒心。
另外，經紀陳早前曾提過中新集團（563）可以炒業績，隻股下周一公布中期業績，但噚日已有異動，最高見過0.50元，收0.475元，升23.38％，成交817萬元。
慕容小初