工商及科技局局長曾俊華最近人氣急升，連全球第一單BT友都被香港海關捉到，（八方按：BT唔係煲呔或英國電訊嘅縮寫，而係講緊一個叫做BitTorrent嘅電腦程式，一種喺網上上載同下載檔案嘅方式），班夥計咁勇，你話個老細係咪有運行。
鬍鬚仔曾俊華自從○三年八月臨危受命，毅然加入老董內閣，接替咗唐英年做工商及科技局局長之後，由於工作範圍同民生冇乜直接關係，又冇乜政治火藥味，所以啲市民唔係幾識佢，連上港大民望榜都只係得嗰一兩次。不過，不上榜由自可，一上就一鳴驚人。點解咁威，可能要多得城中首富李嘉誠嘅頭號馬仔霍建寧。
八方講過李超人所託非人，佢位霍大班用裁員嚟大個弱過藥煲嘅特區政府，原來唔只八方睇唔過眼，廣大群眾都好㷫，覺得李家太過份。正當大家滿肚火之時，特區政府竟然重有個不畏權貴不謀後路嘅高官，正義凜然喺鏡頭前反擊和電國際，叫佢如果怕競爭，就唔應該做生意，政府唔會因此就範，佢就係鬍鬚曾。
此語一出，市民當堂拍爛手掌，剛好港大喺個幾日做民調，曾局長最後一日急起直追，得到五十二點三分，與李國章同分，問責官員中排第七，如果個民調做多兩日，八方擔保佢一定排名更高。
嗱，曾局長好明顯幫老董個政府挽回唔少聲望，不但冇官商勾結，簡直係官商企硬㖭，老董真係要知寶，因為佢個內閣，唔係個個都咁硬淨。講開又講，八方都要同霍大班講聲sorry，唔係佢，未必有咁大筆錢撥入李嘉誠基金會做公益，加拿大政府都應該寄張多謝卡畀霍大班。
其實鬍鬚仔唔賣帳早有前科，記得佢上任冇耐，就同李嘉誠力撐，話佢建議喺深圳河套區搞加工區不合時宜，走回頭路，香港工業唔係穿膠花。八方當時已經笑佢夠勇，退休唔使諗加入長江和黃做嘢。佢點反應？梗係一笑置之啦。
傳真︰2623-9278
電郵︰