嶺南大學校長陳坤耀噚日剛啱六十大壽，八方喺度祝佢壽比南山。教咗三十幾年書，陳校長噚日出席一個嶺大等機構一齊搞嘅會議時，話學生質素好似紅酒咁，某啲年份特別好，七三年嗰屆畢業嘅學生就最「正」。
點解七三年？因為當年嘅畢業生中，有三個做咗或做過高官，包括財經事務及庫務局局長馬時亨、經濟發展及勞工局局長葉澍堃、同埋前財爺梁錦松。個會係講「全球化與區域合作」，馬仔見到陳坤耀，埋怨陳校長當年冇教佢全球化同通縮；陳校長就話佢當年只係教佢經濟導論，話「你個底打得唔好就關我事。」
（圖）馬局長（右）畀面陳坤耀，去黃金海岸演講後，飯都冇食就趕番立法會。
傳真︰2623-9278
電郵︰