恒指升咗兩日，又試跌過，最低唔見161點，埋單報銷78點。呂志和對孖寶，忽然大變，影響人心。尤其隻嘉華建材（027），3點47分做緊6.70元（前日收7元），3點53分碌到5.65元，4點收市做6.50元，13分鐘嘅變化，令炒家財富大轉移，唔輸死都嚇死。
中海油C輪：恒指成份股只得4隻有得升，窩輪龍虎榜上盡係P輪天下，有個別例外。隔晚紐約油價上升，中海油（883）升3格，收3.925元。C輪2217收10.1仙，飛升44%，成為第4大升幅輪。隻輪下月初到期，最後買賣日則係本月28日，得番幾多日玩，有數得計，溢價4.5%，槓桿率38.9倍（有效16.7倍），引伸波幅36.5%。時間因素對隻輪不利，隻輪博唔過。
如果認為油價仍會上升，勉強可以諗吓4580，呢隻6月到期，唔使咁快輸溢價，交投亦暢旺啲。
4580輪價20.7仙，溢價9.4%，槓桿率19倍（有效7.6倍），引伸波幅34.3%。
中石油C輪：油價如果再升，中石油（857）亦都會有啲表現。揀C輪短炒，4655係正路之選，10月至到期，大把時間，輪價34.5仙，溢價7.9%，槓桿率11.9倍（有效6.1倍），引伸波幅27.2%。以輪論輪4655比較中海油C輪4580安全啲，值博率高啲。
駿威C輪：恒指成份股中，駿威（203）唔見3.9%，收2.50元，跌幅最大。9隻C輪中，2289散38%，散得最勁。
就算認為駿威會有技術反彈，啲C輪都博唔過。除咗難買賣之外，大多數溢價講緊溢價逾30%，槓桿率會飛都係假。
章盛