自上個月印尼九級大地震引發世紀大海嘯後，好多兒童都失去家人變成孤兒，有不法之徒重乘機拐帶兼販賣兒童，甚至將可愛嘅小朋友作為性奴隸，所以著名拉丁男歌手RickyMartin喺星期一已經去到今次海嘯其中一個重災區泰國，實地視察當地情況，之後再計劃點樣實行保護兒童嘅工作。
Ricky星期三早上首先同泰國總理他信見過面，了解今次泰國嘅受災情況，下晝就即刻去曼谷嘅泰國紅十字會兒童之家探望孤兒，而前日同噚日，Ricky重特別去到泰國南部布吉島一帶視察，前日佢喺俾海嘯無情摧殘嘅一條破落村莊，同一班災民傾談，雖然佢熱到成身濕晒，但係都冇嗌辛苦，而且好細心咁睇失蹤人口嘅告示板。
而噚日Ricky繼續喺布吉視察，佢同兩個攝影人員以及一大隊工作人員去到一條村落探望災民，又同學校入面嘅小朋友玩，𠱁到佢哋非常開心。
另外，Ricky又去探訪難民營，裏面收容咗好多因為海嘯而喪失家園嘅災民，其間佢同班災民影相簽名，見到個可愛嘅BB仔又抱住佢猛咁玩，而班災民見到Ricky都暫時放低哀傷嘅心情展現笑容，相信Ricky見到佢哋開心番都應該感到安慰。但佢嘅工作重未完成，因為佢視察完呢啲受災地區後，會再決定應該點用佢嘅慈善基金去幫班災民。