謝天華與女友李天恩昨日冒着寒風在戶外舉行婚禮，結束十二年愛情長跑，身為兄弟團成員的洪天明更捱義氣被一眾姊妹玩。而謝天華整日亦頗為緊張，完成婚宴才鬆一口氣。
謝天華與拍拖十二年的女友李天恩（Tina）昨日在深灣香港鄉村俱樂部註冊及舉行婚禮，張達明夫婦、張錦程夫婦、司馬燕和譚耀文等均有到場觀禮。一眾姊妹團大搞新意思，玩盡新郎及一班兄弟，才讓謝天華抱得美人歸。
謝天華邀請了好友鄧兆尊、阮兆祥、洪天明及排舞師SunnyWong出任兄弟，而趙學而則是姊妹團的成員，謝天華昨日說：「天明要着住性感內衣喺禮服上面，然後去超級巿場買女性用品，都好多人望住，天明咁幫手，下次佢結婚我一定幫佢頂番。祥仔最怕活雞，姊妹要佢捧住影相，而兆尊就要rap歌。我都好多謝班兄弟咁幫手先娶到新娘。」
一對新人邀請了副婚姻註冊官到場主持戶外婚禮，雖然天氣寒冷，幸好仍順利完成。謝天華說：「我好緊張，我之前都擔心天氣，好彩今日都好好天，晚宴完就安樂晒。我以前拍戲都試過結婚，但同真結婚係兩回事，Tina事前重喺屋企試簽名，佢當時都好手震。」天華早前曾表示婚後不設防，昨日他說：「造人大計會順其自然。」
謝天華與Tina昨晚亦在深灣香港鄉村俱樂部舉行婚宴，好友陳小春、李珊珊、張智霖及袁詠儀、姚樂怡、杜汶澤及田蕊妮、康華、沈嘉偉及邱淑貞等均有出席。而嘉賓之一的薛家燕昨晚說：「我送飯煲同兩個椰子畀佢哋，希望佢哋連生貴子，重要打孖上。」
採訪：卓美娟 攝影：葉君海
