炒風盛，有投資者專門挑選細價居屋，貪其成本低，易入易出。世紀廿一聯盛藍田分行李志江話，活躍於將軍澳同藍田嘅炒家，近排睇中坐落市區、又近地鐵站嘅藍田居屋。
前日專誠花一整天搵盤兼睇樓，終於搵到五個超筍單位，全部低市價五至十個巴仙，於是毫不考慮，用五百萬掃晒。
其中銀碼及呎價都最低嘅康華苑A座中層七室，五百七十五呎，成交價八十三萬，每呎一千四百四。
呢個炒家咁豪，因為之前賺埋唔少。聽講，佢早排喺將軍澳炒樓，炒到出晒名，高峯期揸住十幾個單位，又試過喺沙士期間，低買高賣，每伙轉手賺五、六十萬，超過買入價嘅一半。不過，今次一口氣買咁多個單位，都係第一次，佢𠵱家手頭上有十八個單位，市值近二千萬。
港人置業首選向南樓，但竟然有人鍾情向西北單位，原來同風水有關。
呢個買鰂魚涌康怡花園向西北單位買家，喺附近返工，諗住同區置業，睇咗十幾個盤，主要係向西北單位，最後睇啱E座中層二室，六百四十八呎，風水師睇完，都話利家宅，加強佢入市決心。
買家喺簽約前，搵埋阿姨幫手搞手續，順便睇多次，先知咁橋阿姨幾年前租住過同一個單位，都覺得好風水。買家話，原來最初係佢阿姨推介，搵呢區嘅住宅。
最後，以二百六十萬成交，每呎四千。中記楊文傑話，比市價平五巴仙。
業主九○年用一百一十五萬買入，一直收租。由於本身長住海外，見租約就完，所以趁勢平少少快啲出貨。
經貿商會會長李秀恒或有關人士，手持油塘榮山工業大廈，見油塘灣重建，唔知幾時搞得成，又唔想丟空，咪向城規會申請，改裝做食肆、展覽場及零售舖頭，用嚟賣吓家具等，諗住做到幢樓拆為止。
城規會考慮過，油塘灣雖然短期之內都難重建，但長遠就一定要做。
如果完全接納申請，第二日真係重建，可能會有麻煩，但又要照顧，業主善用土地資源嘅原則，最後批出暫做七年咁多先，之後再睇吓，油塘灣重建會有乜變化再算。
幢樓連地庫有十五層，樓面四十七萬呎。
西環新盤泓都，上周熱賣，市場氣氛唔同晒，但係二手就失色，睇番中原城市領先指數，截至本月九號一周，只得四十九點一六，較前周跌零點一四，重係連續第二周腳軟。中記預期，新春有望上破五十點。
六十二個成份屋苑，三十五個呎價低於一個月前。跌幅最大係深井浪翠園，逾一成二，呎價得番二千一，而荃灣麗城花園就跌逾一成，二千三唔到。
呢兩區屋苑大部份造價都跌，慘情。
西環泓都做完一輪內購之後，示範單位今日終於開放。雖然所剩無幾，發展商仍然樂於做宣傳，聽日喺售樓處舉辦時裝表演。
泓都屬於中小型住宅，就算搞時裝表演，都唔打算走中高檔路線，所以，搵咗班小朋友，示範童裝，順便宣傳個靚校網。
今次表演嘅小模特兒中，重有特別嘉賓，就係新世界營業及市務總監何伍燕榆嘅孫女。細細個已經咁幫得手，真戥何太高興。
電郵地址：
