美國嘅第六十二屆金球獎後日就會喺洛杉磯舉行，由章子怡、金城武、劉德華主演嘅電影《十面埋伏》有份角逐「最佳外語片」。
據內地消息透露，除咗《十》片導演張藝謀會出席頒獎禮外，目前喺美國拍緊電影《藝伎回憶錄》嘅章子怡唔單止會出席頒獎禮，重會做埋頒獎嘉賓，喺金球獎上頒「最佳男主角」獎㖭！
章子怡近年備受國際影壇注目，如果今次消息屬實嘅話，章子怡將成為第一個擔任金球獎頒獎嘉賓嘅中國女演員。馮仁昭聽到呢個消息都好興奮，即刻打電話畀章子怡問吓係咪真，不過章小姐只係答咗句佢正忙於拍《藝伎》，唔知有呢件事喎。咁要知係咪真，後日就有答案喇！
蕭薔前晚同台灣立法委員林重謨錄影節目時，林重謨竟然即場向蕭薔示愛，大讚佢靚女同有氣質，佢哋重共舞一番㖭！蕭薔用國語話：「除了舞蹈老師，他（林重謨）是我第一個在螢光幕前共舞的男人。」後嚟節目又安排佢哋合唱《傷心酒店》，林重謨重應承買蕭薔嘅新唱片。
韓國靚仔元斌初出道時，成日俾人話貌似日本萬人迷木村拓哉。近排元斌喺日本拍廣告，人氣愈嚟愈勁，搞到有唔少木村fans反過來問木村，有冇人話佢似元斌，令到木村唔多高興，認為元斌年紀比較細，出道比佢遲，話佢似元斌簡直係落佢面。
新浪網最近舉行網上投票，雖然有好多歌迷喺網上造票，最後經大會審查每張票，結果由古巨基攞咗「我最喜愛的男歌手」，而楊千嬅就奪得「我最喜愛的女歌手」同「我最喜愛的女性產品代言人」兩獎。至於周杰倫就成為「全國推崇男歌手」，重以《七里香》奪得「全國推崇十大歌曲（國語）」，成績都唔錯。
韓國變性人河利秀早排去台灣錄影節目《綜藝大哥大》，點知有嘉賓追問河利秀做變性手術後，將佢個「寶貝」放喺邊度，又有人笑佢早就用嚟煮麵線加大腸。河利秀返去韓國後，同傳媒吐苦水，結果第日韓國傳媒向台灣還擊，大肆批評《綜》節目冇水準。
