大市進帳7點，短期仍係反覆格局，升上去有沽壓，跌落嚟則有趁低入市買意。
新地C輪4643：長實（001）、恒地（012）與信置（083）等地產股，都有上升，新地（016）則稍跌，收71.75元，唔見兩格。可以趁新地跌低，喺低位撈C輪短炒。
新地C輪4643面世3個禮拜，初時交投幾乎一片空白，頭9日夾埋只係38萬份，近幾日唔同晒，昨日有48球易手，銀碼27球，成為新地最熱門C輪。講數據，算係睇得上眼，6月初夠鐘，輪價56仙，溢價5.4%，槓桿率12.8倍（有效7.4倍），引伸波幅28.3%。有隻新地C輪數據靚絕，就係9548，5月初到期，輪價62仙，溢價得1.7%，槓桿率11.6倍（有效8.3倍），引伸波幅23.4%，奈何全無成交，難買難賣。短炒新地C輪，點都係4643做主角。新地啲快到期C輪，最好咪沾手，除非認為正股會忽然發神經大升特升，正股升少少冇用，短期C輪易蝕溢價。
長實C輪3560：長實升1元，個勢靚，但唔會一支箭咁升，遇有回吐，低位揸多少C輪，對象係3560。隻輪6月中到期，輪價44仙，溢價4.7%，槓桿率16.6倍（有效8.8倍），引伸波幅23.7%。眾長實C輪中，呢隻交投最旺。
國泰C輪4455：國泰（293）由13.95元升上14.35元，C輪4455升41%，收89仙。隻輪係國泰C輪中，數據最靚嘅，不過估中正股走勢都好難喺4455身上搵銀，因為交投太疏，成日得26萬份，都唔夠1個散戶嘅胃口。
章盛