新地上水皇府山鄰近內地，發展商預咗唔少住客，會經常穿梭中港兩地，管理公司有見及此，特別同租車公司合作，提供房車接送服務，住客重可以預訂跨境專車，喺廣東省內採點到點方式往來，慳番唔少時間。
新地代理總經理周國賢話，安排一般專車接送，需時三個鐘，如果住客想要坐指定型號嘅車，要預早兩日訂至得，可以揀嘅車款由平治到七人車都有。佢重話，物業提供跨境專車，都應該係第一個，就算唔返內地，都可以租車四圍去，住客用者自付，不過就會平過同類服務。
至於賣樓方面，周國賢透露，𠵱家重等緊賣樓紙，希望農曆新年前賣，之前諗住保留第五同六座，但係睇番原來啲客幾鍾意第五座單位，所以決定順應民意，推出第五，保留第八同六座至近現樓先賣。
西環泓都成為今期最當炒嘅新盤，市場消息話，頭一、兩日入市嗰批知名投資者，好多都已經出咗貨，賺晒錢，其他整圈大手掃貨嘅買家，都陸續賺錢離場。
港置曹婉琴話，上個禮拜六有個投資者以三千一百幾萬，買咗第一座中低層八個單位，持貨短短四日，就俾一個南區投資者接晒，作價三千二百幾萬，平均呎價五千三，業主差唔多賺咗百三萬，呢批單位幾日就升值約四個巴仙。曹婉琴話，個買家都係炒家，打算加價兩成放售。
地鐵將軍澳夢幻之城首期前日截標，收咗十一份標書，當中只有兩個財團話以合資方式競投，其中一個係南豐發展同永泰亞洲呢對老拍檔。永泰母公司富聯國際噚日發聲明指，兩公司各佔五成股權，估計夢幻之城首期總投資三十二億。
項目可建總樓面一百五十萬五千幾呎，補地價已經二十三億幾，即使地鐵承擔一半，發展商都要負責約十一億六千萬，咁計建費同利息成本約每方呎一千三百五十五蚊。不過，點解同地鐵估計五十五億差咁遠嘅？
南亞海嘯造成嚴重人命傷亡，唔少人都以為當地樓價會急挫，但代理海外樓盤嘅萊坊彭子安話，旅遊熱點布吉島樓價冇即時大跌，但投資意欲減，估計會跌五至十巴仙。剛有投資者問有冇平貨執，彭子安話冇，因為香港人喺布吉買嘅樓，多數係山上嘅海景豪宅，用混凝土同鋼筋起，並冇受今次海嘯影響。
青衣盈翠半島有個租客，住咗五年幾之後，最近突然入市買樓，重買番同屋苑單位，原因係業主加租三成，佢覺得唔抵兼條氣唔順，所以憤而轉租為買。利嘉閣黎鉅豪透露，呢個租客用二百八十八萬，購入一座低層H室，六百四十九呎，呎價四千四，高市價八巴仙。
電郵地址：
