廢董輸政報告，上自中環會所，下至天水圍茶餐廳，昨日全日繼續成為全港笑談！
輸政報告將壽爺訓斥佢嘅內容直頭搬字過紙，自摑數大巴之後，直頭係好似罰抄書咁，保證向「五大方向」努力，第一重點，就係「堅持以公正原則施政，堅決反對『官商勾結』，徹底杜絕『利益輸送』」！
「堅持」乜乜、「堅決反對」物物、「徹底」嚴打呢樣、「堅定不移地」捍衞嗰樣，呢類字眼一睇就知係廢董郁嘴皮、壽爺普通話配音，絕對唔係廢董身邊啲三流土共文膽所寫得出！重有避免為國家「添煩添亂」、「幫助那些對中央存有對抗意識的人改變想法」，亦係百分百大陸佬把聲！
遍查廢董多年廢噏紀錄，佢從來冇承認過、亦一字都冇提過特區有「官商勾結、利益輸送」，既然冇，又何從「堅決反對」？一吓隊到咁盡，擺到明就係壽爺將部微型錄音機安插喺廢董深喉，即是話：中央人民胡溫政府，正式承認並接納咗長毛李卓人所長期控訴嘅「官商勾結，利益輸送」，壽爺並響應長毛號召，下令廢董要嚴打！
講到咁明，不過係都有人同壽爺搞對抗！曾經準確地將廢董形容為三零部隊嘅朗尼陳等人，企圖將壽爺聖旨淡化，話冇咁嘅事，又話見仁見智！
朗尼搞百人會，邀請馬小九來特區同美國官員密斟，勾結外國勢力，觸犯天條，自己有案在身，𠵱家又企圖將矛頭撥向數碼港，轉移壽爺注意力，想另開「快勞」，可見商界內鬥，鬥得幾咁悲壯！
連「扶貧」都擺埋出嚟，加埋「以民為本」，可見廢董跟貼壽爺，係幾咁流汗索氣！睇嚟好快佢就要等一單山泥傾瀉，然後學溫家寶咁，親自走訪死難者之家，攬住個孤兒，滿眼淚光，講一句「我來晚了」嘞！
可惜香港冇煤礦，山泥傾瀉又要等到夏天雨季，八萬五建屋目標黃咗，地盤又停晒工，唔知幾時至等到一單籠𨋢意外，不過廢董可以利用呢個工傷意外淡市，惡補定啲唐詩、泰戈爾、余光中呀咁，怕就怕在等到有機會咁表演時，正如美國新聞周刊元旦預測咁，溫寶寶可能會今年提早落台，咁又前功盡廢！
邊個話今年冇驚喜？輸政報告變咗悔罪書、罰抄書，同埋有安徽口音嘅普通話配音嘅棟篤笑，壽爺上完身又輪到長毛間歇性附體，集悲喜劇、諧趣扯線木偶及恐怖片於一爐，咁多年屍政，真係今年最好睇喎！
傳真︰2623-9278
電郵︰