日本再有球員出國到歐洲球壇闖蕩，中國超級聯賽改革亦搞到滿城風雨；另一東亞足球強國南韓同樣唔係太平盛世，為改革而問題多多。
南韓足總決定訂出一系列目標，重新振興國內足球同國家隊成績，尤其國家隊目標要達到打入○六年世界盃決賽周最後四強，○八年北京奧運會男足同樣要攞獎牌。至於長遠目標就係○八年時，要躋身國際足協排名榜嘅前十五位，到二○一○年打入前十名。
制訂目標一出，即刻引嚟南韓國內教練同球迷極力反對，認為定位太高，反而無認真從本土聯賽發展着手，球迷重喺互聯網發起罷睇新一季聯賽，以示不滿。
南韓上屆世界盃攞殿軍，世界排名最高都係去到十九位，重話要重溫世界盃四強美夢。雖然過去一年俾宿敵日本攞番「亞洲一哥」地位，但我求大俠覺得真係大想頭啲喎！
紐卡素領隊桑拿士努力搵防守球員，拜仁中堅古科亦係目標人物，但簽唔簽得成，重要睇布力般。唔係布力般同佢爭古科，而係曉士要簽另一拜仁守衞連基。有咩關係？拜仁領隊馬加夫話只可放一個走，睇邊份轉會條件有利球會，兩間英超球會咁樣爭人，我求大俠真係少見。
馬賽教練杜斯亞早前突然放走李沙拉素，決定搵效力鹿島鹿角嘅中田浩二試腳。由於杜斯亞曾經執教過日本國家隊，對日本球員相當熟識；據杜斯亞透露，中田浩二唔會頂替李沙拉素個位，反而會安排佢踢防守中場。亞洲球員踢防守中場體能方面幾蝕底，得唔得重要睇試腳一關。
日本前鋒大久保嘉人周日喺西甲聯為馬略卡處子上陣即有波入，我求大俠早幾日報道過；比較可惜嘅係，嚟緊呢周聯賽對貝迪斯，未必可以畀佢再發威；原因佢喺對拉科嗰場其實已經有傷，賽後軍醫證實要唞十日。反正呢個禮拜冇馬略卡直播睇，希望下周可以見到佢啦！
AC米蘭嘅荷蘭中堅史譚已經喺前日意盃對巴勒莫復出，照睇老將哥斯達古達落場機會愈嚟愈少。好似「達叔」臨危受命重交足貨嘅球員唔多，AC想同佢續多兩年約，即係到佢四十歲。「達叔」唔係龍門，同輩球員多數已執教鞭，如佢真係續約，呢棵「長春樹」夠經典囉。