前環球唱片高層陳少寶，早前捲入樂壇貪污事件，搞到佢離開環球，兼且唔做娛樂圈，走去搞飲食開餐廳。𠵱家事過境遷，少寶決定東山復出，重同友人夾份投資二千萬，開咗間寶號娛樂製作公司，自己做埋經理人，頭炮就用八百萬力捧新人陳苑淇。
原本陳苑淇同環球重有合約，喺六月先至完，但少寶同環球傾掂數，𠵱家苑淇可以即刻過檔。少寶話佢嘅製作公司唔單止做音樂，所有演藝製作都會參與。少寶自從離開環球之後，好多環球歌手都私底下同佢呻，話環球嘅成績漸差，佢都覺得近年樂壇俾英皇霸晒，感覺好悶，所以決定重返樂壇大展拳腳。佢𠵱家正物色一啲普通話了得嘅歌手，希望打入內地巿場，至於佢會唔會同麥浚龍（Juno）再次合作，佢就話由始至終都覺得Juno有實力，但𠵱家已經冇聯絡。
另外，少寶早前喺北京聽到王菲退休嘅傳聞，佢話：「我的確聽聞佢退休，好多人都同我講話阿菲唔唱，聽聞佢想結婚，我知佢係幾恨嫁。」
許冠傑（阿Sam）喺下個月嘅農曆新年又會舉行演唱會，噚日門票正式公開發售，不過唔知係咪有唔少樂迷睇過好多次佢嘅個唱，所以噚日朝早只係得三十人排隊購票，其中一個忠實歌迷重話除咗第一場未能成功買到飛外，佢場場都有睇，佢重話：「其實我哋都係想睇阿Sam，最好今次唔好有咁多攝場嘅嘉賓啦。」
麥浚龍（Juno）噚日到商台接受《叱咤樂壇》訪問，嚟緊二月頭佢會舉行音樂會，話想請一班好友同台演出，𠵱家就打算搵陳冠希同余文樂叫佢哋支持吓。Juno重話頒獎禮後全公司去旅行，重話吳日言已經誇下海口請大家去歐洲旅行，佢亦提議不如由Bliss同新成員ILoveUBoyz請大家shopping，加埋酒店同食嘢，咁就全包宴。
混血名模Rosemary前晚同媽咪齊出席信用卡喺中環搞嘅活動，佢媽咪話個女未有自己嘅信用卡之前，就開咗張附屬卡畀佢，重好豪氣咁話至少有成五十萬限額，到Rosemary有自己信用卡用嗰陣，最誇張碌爆卡嘅一次就係買咗架瑪莎拉蒂跑車，真係豪得驚人。
劉家輝噚日喺天后客串演出韓國電視劇《HongKongExpress》，劉家輝喺劇中飾演收數佬，佢話好開心可以參與韓國嘅電視劇，劉家輝話：「其實我好多年前都有拍過韓國電影，拍電視劇就係第一次，不過我都只係客串三日，其實韓國好多人都識我。」劉家輝做過《標殺令2》嘅白眉道人後就更紅，啲人點會唔識佢？
毛舜筠同鄭丹瑞噚日以聖安娜代言人身份出席賀年食品宣傳活動，會喺新片《早熟》做房祖名阿媽嘅毛毛，噚日重大讚祖名，佢話：「好鍾意呢個後生仔，佢好謙虛，又受晒佢媽咪IQ高嘅優點，我諗呢方面成龍就冇功勞啦，同埋成龍一生人最大成就係有呢個仔。」
