澳門賭業股噚日在嘉華建材（027）同大廚嘅東方明珠（600）帶領下，出現強力反彈，奧瑪仕（959）亦在濠江一邊大力唱好下繼續反彈，令早幾日的跌幅大為收窄。
雖然濠賭股大反彈，但經紀陳同小初都好懷疑，究竟重有幾多散戶夠膽跟進？就算有人夠膽跟入，相信賺咗幾個價位已經獲利鬆人，大戶究竟可以點樣散貨呢？小初重有一點唔明白，江湖傳聞東方明珠有老虎基金入股，但呢個基金唔係早幾年已經解散咗咩？大家炒消息之時要諗清楚。
除咗濠賭股之外，有啲正路嘅股份其實亦在靜靜地起革命，好似就快完成私有化依利安達（033）的建滔化工（148），近期股價表現硬淨，一直在52周高位附近徘徊，噚日再升4.12％，收17.70元，成交6326萬元。
經紀黃話，建滔大拿拿攞幾億銀出嚟私有化依利安達，雖然價錢係貴咗多少，但在完成收購後，建滔業務更為全面，由覆銅面板至印刷電路板，上下游都做晒，size亦大得好交關，更為芬佬受落，所以股價隨時高處未算高。
慕容小初