辣㷫西甲教練火藥味濃
球驗客手記：盧帥要學好「牙」語

新官上任三把火，皇馬新教頭盧森貝高，最近就妄言批評西甲聯一眾球隊教練，唔似得佢哋來自巴西聯賽嘅咁專業。
首先還火嘅梗係啱啱喺馬德里市打吡戰中，贏形勢而輸波嘅馬體會教頭費蘭度啦。
但其實呢位操葡語嘅巴西人，目前對西班牙文重未係咁耍家；重要調轉身份「拜師」朗拿度及卡路士等鄉里，學好呢門語言。

「拜師」朗拿度被整蠱？
呢番咁狂妄嘅說話，可能係同記者溝通上有誤會，被人曲解咗啫。
當然，亦有可能係一向貪玩嘅朗拿度及卡路士等，特登教錯幾句，整蠱呢位老人家都未定噃。

意國公眾場所禁煙納比唔戒挑戰法律
意大利啱啱將禁煙令伸延到餐廳、酒吧呢啲公眾場所，意大利國家隊教練納比不嬲雪茄不離手，之前球場內唔畀食煙已經搞到佢好唔慣，家陣連出街食飯都無得食，難怪佢叫苦連天。不過，佢就話飯後一雪茄呢個習慣就死都唔改，仲話公眾場合會照食，咁惡？！

伯明翰「臨記制」收效安達頓爭氣獲新約
季初加盟伯明翰按表現制訂薪金嘅安達頓，終於獲得領隊布魯士給予一份長達十八個月合約，對呢位被視為「玻璃腳」嘅英格蘭中場，真係新一年開始嘅好消息。布魯士話安達頓由加盟開始一直無缺席過操練，重幫球隊入咗三球，所以決定續約，安達頓唔使再為失業彷徨。

迪肯尼奧手勢鬧大德國要意足總開審
拉素前鋒迪肯尼奧涉嫌喺比賽時做出法西斯敬禮手勢，意足總已展開調查；但德國佬反應好大，話如意足總唔罰迪肯尼奧，歐洲足協就要出手。早前德國佬阻止德甲巴西兵入籍卡塔爾，𠵱家又想隊死迪肯尼奧，但得閒理其他人啲嘢，不如顧掂自己個德甲聯同支國家隊好過。

謝菲遜骨折要「收咧」網隊衰嘢停不了
新澤西網隊今季可謂禍不單行，季初成績一落千丈，主將傑特又鬧離隊；最近羅致咗卡達之後，啱啱先至有番啲生氣，點知噚日又傳出噩耗。隊中得分王謝菲遜因為左手腕骨折，今季常規賽要提早「收咧」，最快要到五月嘅季後賽先至復出。睇嚟網隊入季後賽嘅希望愈嚟愈渺茫。