澳門賭業股連跌多日，噚日晏晝出現強力大反彈，好似日前跌得好勁嘅嘉華建材（027）、英皇中國（2955）等，腰力皆異常驚人，前者倒升20%，後者亦升16%。
奧瑪仕（959）據聞將於今日公布希臘神話賭場第二期發展，同埋星洲投資賭場計劃，因此亦扭轉多日跌勢，股價倒升5.7%。
不過，經紀陳就話今次反彈唔會維持好耐，因為濠賭股噚日反彈，除咗部份在低位撈貨的投機者會睇位沽貨外，其餘蟹咗嘅散戶亦會趁機逃生，可說係阻力重重。
另外，經紀陳上周提過嘅中國水務（855），自從改名以來，股價一直企穩，兼且繼續keep住有一定成交，就算呢排大市回落，佢都好似冇乜影響。
經紀陳話，江湖傳聞中國水務或會配股集資，作為發展大陸水廠項目之用，但搞唔搞得成尚係未知之數。中國水務昨日微升2.5%，收0.41元，成交股數335萬股，金額136萬元。
慕容小初