男子組合Boy'Z喺舊年傳過拆夥，原因係成員Steven唔生性，學習態度散漫，佢同傅珮嘉拍拖，令到佢同英皇之間嘅關係一度惡化，雖然公司最後都原諒咗佢，但Boy'Z喺今年終於難逃拆夥命運！
馮仁昭聽聞Kenny由下張碟開始會獨立發展，至於Steven就會同新加入嘅成員繼續以Boy'Z嘅組合形式出碟。如無意外嘅話，Steven嘅新拍檔會係參加新秀歌唱比賽嘅得獎者。其實Boy'Z由組隊到𠵱家，Kenny一直好勤力，喺待人接物方面處理得唔錯，又聽公司話；Steven雖然比以前勤力咗，但進度緩慢，而且𠵱家重瞞住公司同傅珮嘉藕斷絲連，體形又一日肥過一日，所以英皇多次開會考慮後，決定拆散Boy'Z。
由於Boy'Z有唔少廣告合約喺身，所以兩位成員都要一齊做廣告宣傳，而拆夥事在必行，所以近日有內地服裝廣告商搵佢哋擔任代言人，都被英皇推咗。
Boy'Z嘅經理人霍汶希噚日被問到時，佢承認確係籌備緊Boy'Z拆夥，因為Kenny嘅發展比預期中好，可以獨立工作，而Steven就會留低同新人合作組隊。
陳松伶日前獲邀幫一間保健中心擔任代言人，重拍咗輯硬照廣告。由於拍攝當日天氣轉涼，得番十二、三度，松松着住啲性感服飾就算凍到牙關打震，但依然毫無怨言，今次松松擔任代言人，重日日有免費按摩㖭，佢話：「好多都市人都有太大嘅壓力，容易發脾氣，透過按摩同拍打肌肉等治療，人都精神煥發啲。」
陳慧嫻自從識咗個醫生男友後，一路好少露面，之前曾經公開話啲樂迷唔識聽歌，佢已經唔想再唱，正當大家以為佢要退出樂壇時，前晚喺上海做頒獎嘉賓接受訪問時又話有樂壇十年大計，因為佢嘅經理人合約已滿，佢好想搵番個經理人幫佢主攻內地市場，即使同男友分隔異地都冇計喎。
黃宇詩噚日正式幫薛家燕個電台節目做客席嘉賓一個月，好姨重細心送三個錦囊畀佢，提佢事事小心。黃宇詩話：「呢次唔係第一次做電台主持，我一直都好有興趣做DJ，咁啱今次有機會。本來監製想我講爸爸，我諗已經講得七七八八，後尾因為南亞災難，諗到以過來人身份講點面對家人死亡，點平復個心情，用我角度去睇死亡。」
謝霆鋒噚日到商台接受訪問，對於近日佢嘅舊愛張栢芝高調咁話要慳埋啲錢做善事，問到霆鋒會否效法時，佢就即刻話：「之前我去咗內地十個唔同地方做宣傳，每個站我都會發起籌款，淨係杭州都已經籌到六十六萬，重試過有歌迷送咗紅十字會捐款嘅收據畀我，係令我最驕傲嘅禮物。」
