廢董施政報告出籠，嚇人一驚，居然自摑自插，認錯認衰，話自己要深刻反省，由於對政治經濟變化「思想準備不足」，所以七年半以來反應唔夠快，令到市民痛苦不安！
乜啲挺董保皇分子，七年以來唔係護董吹到天花龍鳳，又賴前殖民地埋地雷，又賴公務員唔合作，又賴港英餘孽及外國勢力搞破壞，又賴陳方安生抵制作梗咩？乜唔係全世界都有錯，獨係老董冇錯，兼俾人整蠱俾人害咩？
如果廢董深刻反省，都反省出咁多條罪，點解佢唔一早落台，重要競「選」連任第二屆，加深延長香港人嘅痛苦同不安呢？既然廢董自認咁唔掂，點解跳水女國寶郭晶晶男友嘅阿爺兼國家領導人霍英東先生，大大聲咁話「我挺董」，重得到全場挺董保皇分子熱烈鼓掌呢？
點解江澤民尚未交出中央軍委主席嗰陣，又唔見廢董咁坦白認錯呢？哈哈哈！好搞笑喎真係！
遵照壽爺聖旨，乖乖自我檢討，唔怪得近日親中老左，一個個轉軚改口風，對呢位佢哋歌頌足七年嘅董生愈來愈唔客氣，重挺身帶頭揭發廢董其他嘅罪行，例如行政會議成員鄭耀棠哥就揭發：人哋廣東黃華華榮升做省長，棠哥勒令阿董拍發賀電，點知遭到阿董頑強抗拒，俾棠哥話佢無禮兼唔識大體㖭！
正所謂牆倒眾人推，唔係棠哥以知情人士身份咁揭發，港人真係誤會咗董生，以為佢無條件全方位愛晒國，點知原來佢愛國唔愛「廣」，愛國都暗中留有彈弓手！
至於阿董竟然狂呼堅決反對官商勾結，反對利益輸送，完全語無倫次，重以為佢俾長毛上咗身㖭！下次長毛舉牌遊行，記住預埋阿董個位，請阿董做「反官商勾結反利益輸送民間抗爭大聯盟」嘅終身名譽主席喎！
另外一大堆口號，甚麼「包容共濟，和諧社會」、「以民為本」、「冇經濟繁榮就冇社會穩定」、「急市民所急」等，十足凌晨三點兩大電視台所播映嘅粵語殘片戲碼：「餐搵餐食餐餐有」、「新馬仔拉車行大運」、「滿天星斗」、「七擒七縱七色狼」等等，套套都播過一千次以上，播到斷菲林兼跳晒鏡頭嘞！
所唔同嘅，就係呢啲殘片裏面嘅祥哥新馬仔，烏眉瞌睡咁喺張帆布床屹起身，𢱑𢱑個頭，今時今日睇番都重咁後生，可憐董生眉髮經已全白咯陰功！
傳真︰2623-9278
電郵︰