李國章喺立法會講英基（EnglishSchoolsFoundation），十分勞氣。因立法會議員之中，好多人與英基有千絲萬縷嘅關係，例如子女在英基學校讀書啦、做過校董啦、家族背景啦，總之人人不同，一言難盡。一啲議員反而鬧政府過往縱容英基，就十分搞笑。譬如在英治時代，港英政府邊度會捉英基痛腳吖，啲議員一句聲都唔會出；到咗回歸後，又冇人理喎，直至李國章出任教統局局長，佢就係第一個政府高官夠膽去挑戰英基王國嘅，佢曾經寫信去英基，要求核數；英基就整封律師信畀佢，話根據法例，教統局冇權核英基嘅數，於是阿瑟王為之冇符。
哈，點知審計署有權審查所有向政府攞錢嘅機構噃，一查之下，就爆出唔少不合理嘅支出情況，阿瑟王立即揸住份報告再向英基挑戰，英基派人到立法會回答。奇怪嘅係，過往立法會議員總係咬住啲超支機構不放，問到當事人口啞啞；但英基到咗立法會，大家都唔知幾客氣，似喺香港會飲下午茶多啲喎。朝裏有人好做官，大家明白呢句話點解未？
英國人退出香港，英基嘅教育任務大致完成，唔應該一年再花十億元納稅人嘅錢嘞，不如政府一次過撥款二十億元作英基基金，之後英基轉型成為私立國際學校，與淺水灣HKIS及CIS（漢基）競爭，唔好再伸手攞納稅人嘅錢去津貼佢啲行政人員住響壽臣山或者山頂或者半山區豪宅。英基學校啲成績是否叻過HKIS與CIS，重係未知數，以後脫離政府津貼架構，唔使俾教統局局長篤口篤鼻，豈非更好！