日韓興啲乜：<br>唱K整爆笑VCD掟上網全人類睇晒

日韓興啲乜：
唱K整爆笑VCD掟上網全人類睇晒

唔知大家曾否收過一個Forwardemail，內容係有兩個韓妹在大展歌喉，並以猩猩舞姿不停彈跳，極之騎呢搞笑！如你曾好似筆者與同事們咁欲罷不能一看再看，並曾奇怪誰是這齣爆笑歌舞短片的編劇和導演，以及整件事的來龍去脈，今天，你可以在韓國這個叫做PINKYSTAR的地方得到答案。

記者：張銘恩　攝影：陳陶鈞
鳴謝：韓國觀光公社（www.tour2korea.com）

■韓妹當正自己係明星，唱K重有台風㖭！

■盡情大嗌，唱得好唔好聽係次要，全情投入就得嘞！

唱K燒碟勁受歡迎

PINKYSTAR其實係一個有點似香港玩貼紙機的地方，場內有一間間房仔（分兩種Size），大家可以入房唱K兼拍低整個過程。呢個唱K錄碟玩意喺韓國已經有5年歷史，分別於釜山同大邱設有分店，而明洞呢間則剛於04年底開幕，房間、設備等當然最新淨。話就話呢個爆笑玩意已經存在5年，但喺韓國不但無Out，重漸漸成為年輕人文化，好多韓仔韓妹都會定期嚟喪玩，對住鏡頭扮鬼扮馬，亂跳亂唱要幾騎呢有幾騎呢，其投入程度，比一般港人口痕唱K更要癲狂！

■明洞店位於地庫一角，喺度玩比起其他分店更有私隱。

■大房可容納8人左右，影到大半身，啱晒一大班Friend齊齊玩。

■細房最多只可企到兩個人，只影到半身。

網上明日之星

PINKYSTAR負責人解釋店名由來，話係希望大家可以喺呢度盡情表現自己，並藉此機會成為明星！點解？因為大家可以將自己的驚天大製作上載到官方網頁畀全世界人睇，就如早前流傳到香港的超爆笑韓國孖女咁，成為全球網民的話題人物！官方網站還會舉辦「HitoftheWeek」等活動，畀人上網投選心水表演者、列出龍虎榜，據聞早前真係有人藉此成功出位，有韓國唱片公司邀其簽約！

官方網頁www.pinkystar.com

■唔識韓文都不妨上網睇吓啲另類MTV，因為真係好好笑。

翻睇精采大作

剛才的出色表演已經一一被螢幕頂的攝錄機錄底並製作成VCD，發洩一大輪後並非就此完事，大家可以即時使用場內的電腦，欣賞一幕幕自編自導自演的爆笑演出，成班人柴娃娃咁勁過癮！

■翻睇演出效果，鍾意的話可以E畀朋友，唔滿意隨時嚟多Take都重得。

■這對大學小情侶乃PINKYSTAR常客，久唔久就嚟玩，因為覺得係一個好有紀念性的玩意喎。

■電腦內附設軟件，可將整個搞鬼過程造成貼紙相，夠多嘢玩。

即睇喪唱樣

筆者當日即場捉住佢哋影低整個錄碟過程，呢班活力四射的年輕人不但無拒絕我，重喺鏡頭前愈玩愈High！

■大會提供多款五顏六色的假髮面具，韓妹戴上後即時Twins上身，好鬼活潑可人。

■裝身後就可以入K房，玩法三選一：只唱K、唱K加錄MP3、唱K加錄VCD。

■揀咗唱K加錄VCD，拿拿臨入錢，把空白VCD放入燒碟機中，收費逐首歌計，想錄多隻唔該再入錢。

■點唱簿一大本，當然韓文歌佔大部份，英文歌都唔少，大大話話都有幾百首，比心機揀飲歌喇。

■戲肉上演，音樂響起，眾人使盡渾身解數，唱到青筋暴現，唱到哭喪咁都唔緊要，走音咪走音囉，最緊要High！

PINKYSTAR

地址：漢城鐘區忠武路24-1Migliore商場地庫
電話：（82）2-2124-2270
營業時間：11:00am至11:00pm（星期一休息）
收費（每首歌計）：
大房：唱K$4、唱K加錄MP3$22、唱K加錄VCD$37。
細房：唱K$4、唱K加錄MP3$15、唱K加錄VCD$22。
交通：地鐵4號線明洞站6號出口，步行3分鐘直達。
註：以上價錢為貨幣兌換約數，$1兌134韓圜。