昨日個市最差時，恒指落到13352（散157點），當時係上晝開市後24分鐘，情況惡劣，大有下試更低位之勢。不過，此刻9RSI得番17.4，好超賣，而由05年1月第1日最高位14267起計，連跌7日跌咗915點，吊頸都要透透氣。見過低位後，恒指高收13565，反升56點。估計短期內個市會再升多一二百點，上番13700。
滙控C輪4441：重磅股中，中移動（941）與和黃（013）對拉動恒指功勞最大，總共拉動29.3。滙控（005）係最大重磅股，原地企喺128.50元。大市氣氛好番啲，滙控唔會唔跟大隊，趁低撈滙控C輪有搵錢機會。
滙控C輪4441收52仙，跌7.1%，跟正股變化應該冇升跌，實情跌4仙，更加值得買。隻輪今年6月尾到期，溢價0.5%，槓桿率24.7倍（有效14.8倍），引伸波幅12.2%。滙控去年11月最高136.50元，當時4441最高1.16元。半年內，滙控重見高價，甚至升越136.50元嘅機會存在，亦即係話4441重見1.16元甚至更高嘅機會亦存在。4441掛牌以來最低價43仙，𠵱家高出有限，上便水位大，值博率高。
恒生C輪2235：恒生（011）升0.50元，收105元。C輪中，2235數據最靚，低位有得諗。4月夠鐘，輪價57仙，溢價0.7%，槓桿率18.4倍（有效12.0倍），引伸波幅20.3%，衰在交投太靜，同滙控C輪冇得比。
和黃C輪2291：和黃有勢，估計個勢唔會太短癮。短炒C輪，揀3574。
要靚數據嘅，揀2291，3月初夠鐘，輪價75仙，溢價0.4%，槓桿率9.2倍（有效8.5倍），引伸波幅22.4%。
章盛