星期六晚翠華茶餐廳巧遇水貨大亨袁仁祥，立即上前擁抱問好，事關早前有人盛傳袁仁祥伉儷聖誕假期去布吉嬉水，一度失去聯絡，難免令人擔心。祥哥點起免稅煙，緩緩呼出水貨煙圈：「咁你都知？我早前確實原本計劃去布吉滑水，不過Nigo臨時救咗我，事後睇番真係頻呼好彩。話說今年生意唔錯，本來早已Plan定聖誕與太座外遊，趁聖誕休息吓，平時去開北海道或者馬爾代夫，諗住未去過布吉，咪去見識吓囉。正想訂機票之際，點知日本拆家打電話嚟，話日本BusyWorkshop於日本新年期間（1月2號）推出紅色猿人迷彩Product。你知唔知呀？紅色猿人迷彩之前一直屬特別設計俾Nigo班嘻哈紅人組合N.E.R.D.着，尤其嗰頂紅色猿顏貨車帽，炒到飛起！而家突然話推出大貨，生意一定好到做唔切，咁咪臨時取消行程，飛去日本做埋呢轉，留番農曆年先去玩囉！如果唔係Nigo決定新年出紅色猿顏迷彩，可能我早已去咗災區，所以呢鋪又要多謝佢關照。」
祥哥邊吸煙，邊擠弄他頭頂上早已被水貨煙熏黃的N.E.R.D.會場猿顏迷彩帽：「所謂珍惜眼前人，人生無常，呢個農曆年我同太座已決定閂門休息，請埋成班夥計去日本北海道玩。你知喇，肯成為我員工已經難得，肯着埋我個品牌作為返工制服更加難求，係時候報答吓大家！」祝袁仁祥新年新景象！
主持人：大食Jack
八卦熱報：[email protected]