是日港股連續第6日下跌，恒指728點化為烏有。恒指收報13509，跌22點，幅度雖然唔大，但個市氣氛唔妥，有寒氣，下跌股份（不計認股證）係上升股份幾乎兩倍。
濠賭股唔掂，搞出火燒連環船。如今，稍為有涉足股市者，即使冇落注玩濠賭股，睇怕冇邊個唔識呂志和呢個大名。𠵱家賭輪，要細細注，或者冚旗，留番啲子彈，第日啲子彈好好用。
恒指P輪4541：恒指跌勢轉緩，短期內若然彈上去，認為個市上完之後會回頭，想造淡，搵恒指P輪短炒，4541與4662可以諗吓。
4541喺3月尾到期，輪價10.8仙，溢價2.9%，槓桿率19.7倍（有效12.0倍），引伸波幅19.2%。
4662喺5月尾夠鐘，輪價19.8仙，溢價5.9%，槓桿率15.2倍（有效7.8倍），引伸波幅23.5%。無論賭P輪或者C輪，最緊要速戰速決。磨得太耐輸溢價，唔化算。
中移動P輪與C輪：中移動（941）連續3日收市喺24元上下，等變化。短炒中移動輪可作兩手準備，如果上升，造淡，買P輪3593，隻輪6月初夠鐘，輪價18.5仙，溢價5.8%，槓桿率13倍（有效6.5倍），引伸波幅27.6%。
正股如果再跌，則造好，買C輪3589。隻輪6月下旬到期，輪價17.5仙，溢價7.1%，槓桿率13.7倍（有效7.3倍），引伸波幅27.8%。又係嗰1句，無論做邊瓣，咪長情，用炒雞蛋嘅速度炒輪就啱嘞。
太AC輪4506：太A（019）收60.75元，跌1.25元，如果跌到59元，買C輪4506，隻輪溢價、槓桿率等數據好正。
章盛