政府今日公布新一份施政報告，各界都好留意，地產代理就關注與樓市有關嘅嘢，重點之一，當然係希望降低印花稅率，咁樣可以推動樓市交投活躍，代理收入自然大增啦！
美聯物業首席分析師劉嘉輝預期，今日嘅施政報告，對樓市應該唔會用好多篇幅，原因係樓市喺○三年已經重納升軌，舊年重全面復甦㖭。
所以，劉嘉輝認為，政府可以調整印花稅，好似調低中上價物業嘅印花稅率，減輕租客嘅負擔。佢建議，樓價六百萬至一千萬之間嘅印花稅率，可以由三點七五巴仙降至三巴仙。
另一方面，利嘉閣地產董事總經理何紹章認為，中產人士係受金融風暴打擊最深嘅一群，政府應調低中價住宅嘅印花稅率。佢建議應該調低稅率，鼓勵市民換樓，改善生活環境。
何紹章話，即使調低印花稅率，都唔會對政府呢方面嘅收入帶嚟影響，因為樓宇交投活躍，呢方面嘅收入自然會增多。既然現時樓市已經健康發展，政府喺樓市方面應該「無招勝有招」。
南亞賑災，無分疆界，內地都有唔同形式籌款活動，祈福集團上個禮拜六日，與中國紅十字會，喺番禺祈福新邨及南海祈福南灣半島社區內募捐。
祈福集團董事長彭磷基，率先捐出一百萬，再呼籲員工、業主與居民，齊齊熱心捐輸。凡捐十蚊或以上，可獲祈福醫院送出「愛心健康體驗套餐券」。
結果，成功籌到一百四十五萬三千五百蚊，全數由中國紅十字會轉交南亞災區災民。
筆錢睇落唔算好多，但相對內地人嘅收入，就唔係咁小數目。
講開賑災，美記澳門部職工都出一分力，分行數目雖然唔多，得幾間，但都籌到五萬蚊，交畀美聯慈善基金，再轉交「澳門心臟基金」籌款活動。
港人北上置業，熱潮未退，而且漸多買嚟投資。
睇準市場需求，深圳市漢利宏投資，限量推出人民南路與春風路交界「新一代商城」，商場樓面近八萬四呎，共三層，單位七十五至二千二呎，大部份舖二百二至五百四呎，售價由二十幾萬起。
代理置業國際表示，發展商為咗吸引買家，提供巨額回贈，將部份租金收益畀番買家，相等於售價四成半。
個場收到近百個認購，三成半嚟自港客。
電郵地址：
