拍過《畢業生》嘅金像名導演米克尼高斯（MikeNichols），今次搵咗英國型男祖迪羅（JudeLaw）、茱莉亞羅拔絲（JuliaRoberts）、妮坦莉寶雯（NataliePortman）同佳夫奧雲（CliveOwen）合演情慾片《誘心人》，其中妮坦莉扮演嘅脫衣舞孃叫人眼前一亮，難怪佢獲得金球獎最佳女配角嘅提名。
《誘心人》係改編自英國同名舞台劇，講述妮坦莉飾演嘅美國少女愛麗斯，初抵倫敦時邂逅祖迪羅扮演嘅小說作家丹，之後兩人就墮入愛河。不過花心嘅丹居然同由茱姐扮演嘅安娜調情，之後又假冒安娜，喺互聯網上勾搭佳夫奧雲飾演嘅醫生萊利，造就咗安娜同萊利嘅情緣。後來呢件事終於俾愛麗斯同萊利揭發，結果搞出四角大悲劇。
妮坦莉喺戲入面有唔少大膽嘅演出，有一幕就講佢喺佳夫奧雲面前，展示下體嚟發洩情傷，而大膽露骨嘅對白亦係呢套戲嘅特別之處。
另外，祖迪羅前妻莎迪霍絲（SadieFrost）表面上恭喜前夫訂婚，不過據知佢私底下好嬲，因為祖迪羅冇親自對佢講關於訂婚嘅事，莎迪要從個仔口中先知，所以佢打電話去狂鬧祖迪羅。