心理學家羅志華在新城財經台評論婚姻（因林煥光布穎琪之戀而起），指出婚姻需要三個Ｃ嚟維持，三Ｃ就係communication（溝通）、commitment（承諾）與compassion（同情、憐憫）。照計compassion嘅意思比較弱一啲，如果婚姻要義「同情、憐憫」（compassion之中文譯法）就該煨咯，如果用passion（熱情、激情、慾望）就會強好多，不過用呢個字，就三Ｃ變成兩Ｃ一Ｐ，冇咁順口。或者compassion喺心理分析學上另有不同解釋，左丁山就阿拉弗懂。
經濟分析師Eric對此另有詮釋，佢話男女之情，開始時如火般熱，如火山爆發，自然係passion；結咗婚之後，passion隨着結婚年數而逐年減退，話唔定過咗二十年之後，激情多情熱情真係會演變成為同情、憐憫，男女兩人之間嘅passion變成係compassion，不過唔知男女之間，邊個憐憫同情邊個啫。到咗末期，連compassion都冇咗，甚麼「承諾」（commitment）都拋諸腦後，直情想分手，重講乜communication（溝通）吖！
Eric所言，或有道理。陶傑講愛情海嘯預警（一月九日）講到女士收情人生日禮物，去年收佢親手造一件泥塑公仔，今年收一罐大路貨丹麥藍罐曲奇，就知道男朋友對自己嘅passion已演變成compassion，激情變咗同情，重唔快啲揮慧劍斬情絲，重由得佢剪不斷，理還亂乎？
情為何物，千古難解。我哋一班讀過經濟學嘅中環人，有一套合乎現實嘅實證（empirical）解釋，不過講出來就實俾人批判過份現實，完全冇浪漫，大家都係睇陶傑講愛情比較舒服啲。讀經濟學之人，多數係悶蛋，拍拖時會諗起拍拖嘅機會成本（因拍拖兩小時而損失之補習費收入）及交易成本（交通費、戲飛、茶餐廳晚飯費用），未必個個女士都受得住㗎。