「大哨」朗拿度唔可以喺情人節結婚，唔係完全關佢事，原來佢未婚妻茜卡雷莉同佢一樣，未辦妥離婚手續至真；如果佢真係結唔成，不如考慮吓嚟香港賀歲兼掘金啦。
之前一直有話「大哨」唔能夠喺下月十四號同茜卡雷莉拉埋，係因為佢同前妻美蓮妮離婚未搞妥；但啱啱出版嘅巴西雜誌《真相》就話，問題唔淨係喺「大哨」身上，茜卡雷莉亦未完全回復單身。據講，茜卡雷莉前年喺邁阿密同一個巴西商人結婚，但𠵱家重未正式離婚，如果佢如期同「大哨」結婚，就會犯咗重婚罪嘞。
聽講「大哨」就算結唔成婚，佢個宴會亦會繼續舉行，但我求大俠就希望佢可以hold住先，改變計劃。𠵱家巴西好有機會喺下月嚟香港賀歲，而站喺球迷立場，當然想「大哨」會一齊嚟，更何況，香港係旅遊勝地，「大哨」可以當嚟預支蜜月，而且佢喺香港咁受歡迎，出席吓廣告贊助商嘅活動，就隨時袋住成袋金走。
畀阿仙奴貶做後備嘅德國門將列文，忍唔住鬧領隊雲格，話乜到入晒佢數。列文的確有犯嚴重錯誤，不過雲格亦有錯，衰孤寒唔肯出錢買好龍門。自施文之後，雲格用過五個龍門，冇個似樣，唔係唔夠班就係年紀大；艾蒙尼亞雖坐正，但我求大俠認為佢同列文一樣都屬過客啫。
踢波同揸車一樣都係咁快嘅史浩克04巴西前鋒艾列頓，最近就試過喺公路上俾警察截停，但就唔係抄佢牌，只係問佢攞簽名。查實艾列頓紀律不嬲唔好，之前多次衰超速；而所謂「生命冇taketwo」，如果佢想長命百歲或唔想提早收山，就應該喺馬路上收斂一下咯。
舊年過咗卡塔爾聯賽嘅前法國國腳杜加里，最近放風話想走人，嫌卡塔爾生活苦悶喎！你慌唔係佢見呢段轉會期，博返歐洲落班咩。據講佢家人因住唔慣卡塔爾，一直留喺英國伯明翰；連老友拿保夫都踢爆，話杜加里𠵱家喺卡塔爾連正選都無份。咁嘅狀態唔知邊隊會要嘞？
六屆環法單車賽冠軍岩士唐噚日重申會等到四月先決定會否參加今年嘅環法賽；但依照合約，呢位美國車手就必須喺今年或明年再參與呢項大賽一次。呢位「抗癌英雄」話明要追求另一種挑戰，依佢嘅性格睇怕佢玩埋最後一次環法賽都唔會再亮相呢項對佢冇乜難度嘅經典賽事。