港股再跌，連跌6日，噚日拋風又集中在「濠」股身上，恒指收市13509，只係跌22點，但「濠」股跌幅就成三四十個巴仙，呢一場乃係長途賽，途中會不斷汰弱留強，「濠」股騎師能夠坐得穩、冇墮馬、跑得入直路嘅，買到佢日後一樣會賺到盤滿缽滿。
「濠」股玩完一個上升大浪，出現一次中期性調整，上禮拜五洗一次倉，噚日再洗多次倉，結果唔少「濠」股都由高位跌咗超過5成。
「濠」股大上大落，波動大，風險亦大，賺蝕機會同風險成正比例，洗咗兩次倉後，唔少「唔係得把口講」、實實在在嘅「濠」股，又到咗幾吸引嘅水平，筆者對「濠」股後市仍有好大信心，只要訂下止賺同止蝕策略，以小輸博大贏，一買中，就讓利潤向前跑，賺到盡。
國企股不濟，但紅籌就好強勢，特別係內地地產股，好似中國海外（688）、北京北辰（588）、華潤置地（1109）同越秀投資（123）等，近期表現都幾硬朗，中國海外暫在前高位受阻，其他略為調整，但已有跌唔落之勢。
銀建國際（171）係另一隻在低位已見有強力支持嘅紅籌，過去3日，係兩個禮拜以來成交最多的，合共逾1.1億股，沽壓雖重，但亦有大盤趁低收集，對撼之勢，頗為激烈。
銀建去年11月底股價曾高見4.625元，近日低見3.125元，跌幅逾32%，亦剛好調整了由去年5月中開始上升大浪的0.382，若確認整固完成，銀建下一個升浪，可向5.50元至6.0元推進。
銀建獲花旗金融入股成為第二大股東，唔單止處理不良資產業務獲得極大助力，而且引入基金投資，亦好成功。銀建已開始進行全球巡迴推介，由花旗擔大旗，首站係日本，跟住會去歐洲，美國更加係花旗嘅大本營，聽聞反應好好，呢兩日已見到有大行買入，個盤好大。
除不良資產業務外，聽聞銀建重有一單大「刁」傾緊，呢單「刁」若果斟得成，銀建股價在現水平翻多兩番亦唔出奇。最近大行出報告，銀建的目標價係5.40元，投資者現水平入市，有機會賺5成，值得一博。
郭兆誠