MP3機熱潮停不了，各大廠都努力開發新型號MP3機，眼見由蘋果電腦推出嘅iPod熱個滿堂紅，人氣持續飆升，引發唔少類似功能或賣相之產品登場。
Panasonic最新推出嘅SV-MP510，除咗賣相比其他機更為靚仔吸引、更為小巧的骰外，來頭亦不小，最巴閉之處係獲2004年度日本權威設計大獎（G-Mark）金獎，證明產品設計上有唔少出色之處。機殼有4色設計，分別係白色、藍色、銀色及橙色，雖然顯示屏尺寸不大，但已足可顯示4行歌曲資料，加埋白色背光燈，非常清楚易睇。按鈕則使用類似iPod般嘅輕觸式設計，控制簡單方便。
模擬CD音質技術
SV-MP510對音質亦下過一番苦功，內置數碼Re-Master技術，將MP3或WMA音樂模擬CD效果播放，原理係加強高頻率處理，有效提升音質。其他功能重包括有FM收音及即時錄音、當USB記憶手指般儲存電腦檔案嘅用途、多國語言操作顯示、數碼錄音及A-BRepeat語言學習等，可以話應有盡有。記憶體方面，SV-MP510內置有256MB，另備有128MB版SV-MP500，用家可按需要而選擇。
記者：許福合