南亞發生海嘯災難，世界各地都舉行籌款活動，而內地嘅賑災活動中，導演陳凱歌同馮小剛係發起人之一，不過連日來內地對馮小剛嘅賑災有唔少負面報道，搞到馮小剛係咁俾人埋怨，佢老婆徐帆覺得老公做埋啲吃力唔討好嘅事，曾經發晦氣對老公話：「再牽頭就跟你離婚。」
馮小剛同記者慨歎話：「真的是好人難做，不僅落得一身埋怨，還把圈裏的朋友給得罪，徐帆也說我，再辦這種牽頭事就跟我離婚，你說以後還敢牽頭？
「其實今次捐款明星有一百位，但媒體卻忽略了，來去只有我和張國立幾個人見報，這樣容易開罪圈中人，而且張藝謀捐了三十萬，有記者問我為何只捐一萬，其實我和家人是捐了兩萬，報道又錯了，做好事沒好報怎不教人洩氣。」
陳慧琳噚日到港台接受訪問，提到佢望住男友Alex唱《嫁妝》時喊咗出嚟，佢話：「只係感動啫！我哋係有計劃過結婚，但唔會短期內發生。如果結咗婚，最怕生唔出，所以即刻生仔，之後就唔做嘢湊仔。我想喺香港結婚，如果到時有傳媒採訪，Alex就要化妝。至於婚禮最好喺一個靚花園舉行，有靚婚紗就得。」
陳彥行噚日去到昇悅居嘅「笑江南」食店剪綵，老闆羅先生含情脈脈咁送上九十九支玫瑰以表特別心意，佢重話本來想送九百九十九支花，行姐話：「佢好有男人味，都幾合眼緣，外形都OK，成熟但有幽默感。自從我擺咗桃花陣，真係有啲效，不過點好都要先畀苑仔（苑瓊丹）同媽咪過目。」
葉文輝（啤梨）將推出新碟，今次佢着起西裝扮成熟之餘，又唱埋HipHop情歌，佢重喺歌詞集度寫咗一篇真人真事散文。故事係話一男一女由邂逅到感情變淡，最後個女仔重慘到離開人世㖭！問啤梨呢個古仔係咪佢嘅故事，佢就𠵱𠵱哦哦。
李連杰前晚同法國導演LouisLeterrier喺巴黎出席由佢主演嘅新片《DannyTheDog》首映禮。呢套動作驚慄片係講述李連杰飾演嘅Danny，從未接受過教育，重俾老闆當係狗咁看待，平日專幫老闆打交嚟賺錢，好彩李連杰最後俾摩根費曼（MorganFreeman）飾演嘅失明教師啟發，先至可以重獲新生。
無綫製作資源部副總監樂易玲早前喺布吉經歷海嘯災難，噚日佢接受商台節目電話訪問時，話𠵱家心情都未平復。講到逃難時，佢話一家人跳船後一齊游上岸，由於佢照顧大仔同樂媽媽，起初以為細仔已經去咗，上岸之後見到細仔企喺度等佢哋，囝囝重話自己係由一個鬍鬚伯伯抱上岸。樂易玲重話後來喺一間石屋後面見到一個好似人嘅白影走過，遇到啲咁神奇嘅事，難怪基督教徒嘅樂易玲話係神迹！
