南亞海嘯來得太突然太嚴重，港人捐了幾次錢都仍覺得自己「做得不夠」。個個如夢初醒，都想身體力行為社會多做點事，卻不知道自己可做甚麼。其實每一家服務團體，甚麼義工服務類型都有，無論是學生、退休人士還是家庭主婦都無任歡迎。
記者：陳慧敏
攝影：陳偉強、周旭文
除了搬搬抬抬、活動Helper外，特別一點的更有繙譯、美術、網頁設計或設計、文書整理、尋人等形形色色，而服務時間亦非限於假日，反而更多文書服務是在平日進行。你隨時可以親身或上網下載一份義工申請表，記下閣下的專長，有需要時服務團體就會自動找上門，讓你貢獻社會。
唔做「食蕉」做義工
天災過後，香港紅十字會立刻發動「警報」，招來大批熟手義工，處理如山的捐款信及電話。雖說工作時間自由，但大抵都是朝十晚六。當了六年義工的雷伯說：「當時退休唔做嘢又悶，去做保安又畀人叫『食蕉』，嚟做服務，大班人齊心幫人反而過得重開心。」
望見支票眼濕濕
響不停的捐款電話，有人要捐出兩部起重機幫忙找屍體及重建，有人要捐一整貨櫃的毛氈，甚至有人要自己買機票到南亞做義工，雷伯數了一半已感動得眼濕濕並說：「華東水災、台灣、印度地震，我都有幫手。但今次好多支票都係幾千、幾萬甚至幾十萬咁捐出嚟，比前幾次都要厲害。我一路拆信一路鼻酸酸。港人啲經濟同信心都未復元，都可以咁，真係好感動！」為了這份感動，家琪被家人投訴「幾日唔見個女」，雪熊及Esther每日回家累到飯都不想煮，雪熊乘機教仔仔：「我有力所以我出力，你有錢所以你要出錢。」又籌到一筆。而一直冇乜點理Esther做義工的丈夫，今次都簡單對她說了句：「我支持妳。」
邊食飯盒邊接電話
採訪時小記昅到垃圾桶塞滿食完嘅飯盒，大家異口同聲：「工作人員成日苦口婆心叫我哋去休息，要食飯，但都冇人理佢嘅！個個義工寧願食飯盒，咬住啖飯都重要聽電話。嗰種熱心嘅感覺，真係好好。」
義工Profile
左起：
家琪：22歲（畢業生）
年資：10年（學生時加入RedCross開始）
服務部門：青年及義工事務部
主要職務：宣揚、教育及推廣健康訊息等。
雪熊：33歲（家庭主婦）
年資：7年
服務部門：醫護服務（輔助器材租借服務部）
主要職務：為行動不便人士進行探訪，及籌辦戶外活動。
Esther：46歲（家庭主婦）
年資：29年（學生時加入RedCross開始）
服務部門：青年及義工事務部
主要職務：宣揚、教育及推廣健康訊息等。
雷伯：66歲（退休）
年資：6年
服務部門：國際及賑災服務部、耆英團
主要職務：為受天災及戰爭影響居民提供緊急援助，平時則為老人家量血壓等老人服務。
香港紅十字會
地址：夏愨道33號香港紅十字會
查詢及捐款熱線：28020021
網址： http://www.redcross.org.hk/home.cfm?langid=2
倫氏四姊妹等細佬退休加盟
甫推開無國界醫生的大門，就見一群對住電腦的公公婆婆抬頭，好醒神的給我們傳話：「《蘋果》嚟咗呀喂！」小記以為入錯辦公室，原來他們都是這次賑災籌款的義工，像已退休的倫氏四姊妹，她們每周兩天到無國界幫忙整理捐款，三個姐姐服務5年，甚至得到服務金章，雖然都是做文書工作，但大家姐Susan：「我哋本來就係教徒，做咗義工後更感受到咩嘢係施比受更有福，而且退休做多啲嘢，個人都健康啲啦！」細妹Lorrita：「我見啲家姐做得咁開心，都提早咗退休。留番啲時間嚟幫手。06年到細佬退休佢又會加入，到時重齊人呀！」
義工Profile
左起：
Lorrita：51歲（退休） 年資：9日
Judy ：56歲（退休） 年資：5年
Stella：58年（退休） 年資：5年
Susan：61歲（退休） 年資：5年
主要職務：如拆信、入資料、核對捐款資料，確保回條在4-8星期內寄回捐款人。
年輕力壯布置場地
後生細仔的，除了可幫忙像本月23號的野外定向大賽，協助場地布置外，其他如整理資料庫、資料搜集、幫忙場地或網頁設計等人材都無任歡迎。
無國界醫生香港辦事處
地址：荔景山道272號荔灣花園5B號
查詢及捐款熱線：23388277
網址： http://www.msf.org.hk/big5/home/
饑饉三十俾人鬧完重想笑
會內職員幾乎個個都認得阿輝，他主要參加不同類型的饑饉三十活動，搬搬抬抬或維持秩序乜都做。阿輝：「有時參加者因為肚餓而心情煩躁，可能會對你發牢騷，但之後又口氹番你鼓勵你，好開心呀。」阿輝還曾幫忙一個弱智人士團體辦嘉年華會，做了一張很大的聖誕卡：「嗰次絕對唔哄動，不過完成咗一份工作，班弱智人士真係好開心，嗰份滿足感好強烈。」他還笑說做義工後覺得個人醒咗，懂得由不同角度看一件事情，阿輝仍覺得自己表達能力不夠好，但其實整個訪問他都講得有紋有路，句句中Point，確實一副醒目格。
義工Profile
阿輝：42歲（地鐵技術員）
年資：12年
主要職務：
籌辦活動，如形形色色的饑饉三十、舊書義賣等。
香港世界宣明會
地址：大角嘴晏架街4號麗華中心2樓
查詢及捐款熱線：23942394
網址： http://www.worldvision.org.hk/default.asp