保安局局長李少光噚日喺電台節目，大讚派去泰國布吉協助港人嘅港府特遣隊，話個個都做得好辛苦，稍後重會搞番個聚會，表揚呢班勞苦功高嘅人員。八方聽到真係忍唔住氣，好質疑「個個都做得好辛苦」呢句說話。
話說海嘯發生後第二日，兩個入境處先頭部隊抵達布吉後，第一時間走訪幾間醫院睇吓有冇港人，重緊張過自己唔見咗親人咁。隨即又去到七國咁亂嘅國際協調中心，佢哋個檔位重未開就有逃出生天、身無長物嘅落難港人嚟求助，因為大家同聲同氣，落難港人都當咗佢哋係水泡咁，佢哋亦不眠不休咁工作，諗住幫得幾多得幾多。
相反，事隔幾日隨同大隊抵達嘅警隊人員，每朝食飽早餐，十點先出發到醫院同酒店，睇吓名單有冇香港人。有日總警司黃柏年親自帶隊到蔻立嘅度假村，點知遲來一步，俾失蹤者家屬搵到家人衣物及證件，之後唔少輿論都責難警方辦事效率。
過咗幾日，記者喺百貨商場撞見黃Sir，佢竟然走嚟口出怨言：「嗰日單嘢，俾上邊插死。不過人生就係咁㗎喇！算數啦！」跟住頭也不回就走咗去。
講番李少光嗰筆，八方覺得表揚做得好嘅同事係應該，但係如果好似分餅仔咁，就對嗰啲真係做嘢嘅人好唔公平！
傳真︰2623-9278
電郵︰