劉慧卿（圖）噚日同記者茶敍，公布晒佢由九一年做議員以嚟嘅公務開支。卿姐話，因為傳媒好關心佢點使錢，所以特登做咗個統計，呢十四年一共貼咗$566,692.6嚟做立法會嘅工作。至於申領嘅開支，夾夾埋埋接近六百萬咁多。
講完錢，卿姐又講吓台灣同埋西九龍。梁振英上年成日挑戰卿姐，話卿姐尊重台灣人民意願就係支持台獨，重要同佢公開辯論，卿姐好有吉士咁話，「就算被人潑多十次屎、放火、打跛腳、甚至打死佢」，佢都會咁講，如果振英哥有膽去街頭論壇，一定會同振英哥辯論。後來梁振英縮窒，不了了之。
卿姐又話，有啲人攞公共資源為自己建立功績，為競選第三任特首鋪路，搞到好似去番以前中國古代諸侯割據一方咁。即係暗批煲呔，唔好為咗做特首，就要喺西九龍霸王硬上弓。
傳真︰2623-9278
電郵︰