自由行概念推動下，唔少業主同發展商，都將工廈申請重建，或改建做三星級酒店，令物業價值大幅提高，但肯出售嘅，就少之又少，𠵱家就有一項。
筲箕灣亞公岩道十八號恒通資源中心，前年獲准改建中價酒店。可以起一百九十間房，行內估計，每個值逾百萬。
該廈佔地逾萬呎，現為一幢十八層高工業大廈，地庫同地下係停車場，有六個停車位同貨車位。一樓以上為工廈，每層約六千五百呎，總樓面十二萬五千呎。物業喺九七年落成。
代理戴德梁行方智傑話，連現租約出售，租期都係一年內屆滿。由於市場上少有呢類物業放售，加上改建酒店，只須六至九個月就搞掂，預料可以吸引投資者同發展商的興趣。截標日期為三月十六日。
入伙一年唔夠嘅青衣藍澄灣，二手呎價維持二千五百零，同附近樓齡近二十年嘅青怡花園差唔多，吸引一批「貪新」嘅租客垂青。
利記黎鉅豪話，今個月首十日，藍澄灣有五單成交，其中兩宗買家係區內租客。
其中一個租開青怡，現購藍澄三座中層B，六百八十呎，付一百八十萬，每呎二千六。以七成按揭，供二十年計，月供六千五。佢見同青怡租金差唔多，所以扑槌。
舊年炒賣風氣直迫九七。不過，相信好少人諗到，原來連二手居屋都有炒家炒番轉。
舊年共有五十六宗二手居屋摸貨登記，睇落好似唔多，比起九七年嘅七百八十七宗，真係小巫見大巫，但已經係九七之後新高。九八至○三年，最多嘅一年，都係得二十九宗，最少僅三宗。
中記黃良昇話，舊年每個月都有居屋摸貨登記，最多係十一月嘅十一宗，最少七月，得一宗。最多二手摸貨登記嘅居屋苑係粉嶺欣盈苑，佔五宗，而一向買賣登記排居屋苑第一位嘅九龍灣麗晶花園，全年得三宗。
今年頭炮新盤西環泓都，掀起搶購熱潮，發展商梗係開心啦！但唔少買家就一肚氣，覺得安排認真差。蘭西噚日聽到嘅市場聲音，主要係話，發展商要佢哋由朝等到晚，都未有得揀樓，冇嘢食冇水飲唔在講，連去廁所都唔准，據聞有啲客搞到要報警求助。有啲客最後頂唔順，惟有是但買個單位，等自己可以提早離開現場。
一年多前，市民買樓，發展商服侍周到，估唔到𠵱家完全唔同晒，政府係咪要正視吓呢？
電郵地址：
