三十二歲的杜汶澤今年將迎娶拍拖五年、二十七歲的女友田蕊妮。杜汶澤透露早前到斯里蘭卡賑災令其價值觀大變，本打算用Tiffiny戒指求婚的他，臨時改買普通白金戒指，終於贏得美人歸。
杜汶澤將於今年迎娶女友田蕊妮，成為娛樂圈○五年第一樁喜訊。杜汶澤昨日在商台節目《在晴朗的一天出發》中，宣布向女友田蕊妮求婚成功，並笑說：「成日話珍惜眼前人，咁講咗都要做㗎！係人都要死，但未死前做啲想做嘅嘢。」
杜汶澤今次求婚成功，原來與他早前為南亞賑災出力一事有關，他昨日接受記者電話訪問時說：「由斯里蘭卡返嚟之後，我嘅價值觀同人生觀有好大嘅改變，同時亦決定咗向女友求婚。一月五號（上周三）嗰朝田蕊妮同盧巧音一齊去馬來西亞紅十字會嘅活動，出發前我將隻戒指塞咗入佢嘅行李度，然後用SMS向佢求婚，佢落機之後問我點解冇嘢求婚，跟住搵到隻冇鑽石嘅戒指，就決定咗嫁畀我。」
原來杜汶澤用來求婚的只是一隻價值數千元的白金戒指，他說：「由細到大，我覺得每個女人都想擁有Tiffiny嘅戒指，於是去咗Tiffiny嘅專櫃，當售貨員攞咗對戒指出嚟時，我又諗既然我去完斯里蘭卡，已經唔想過呢種生活，又何必再買Tiffiny呢？所以就買咗隻幾千蚊嘅普通白金戒指。其實我買過幾次鑽石戒指畀田蕊妮，每次都俾佢鬧我，嫌我嘥錢，呢幾年我都同佢求過幾次婚，但佢都冇應承，話我冇安全感，直至今次，佢覺得我個人成熟咗，加上隻戒指冇鑽石，佢終於肯嫁。」
杜汶澤表示選擇在這個時候公布婚訊，是因為南亞發生的海嘯災難，令巿民情緒偏向負面，所以希望將一些開心的訊息傳給大家，他說：「其實我想話畀大家聽，遇到乜嘢事都應該積極面對，我選擇結婚，想表達嘅訊息係大家可以珍惜眼前人。」
杜汶澤又笑言過去覺得結婚擺酒好老土，但現時已改變想法，他說：「以前我覺得擺酒好老土，但𠵱家覺得結婚唔係一個人嘅事，始終都想老人家開心，無論係佢父母抑或我阿媽都希望擺酒，經歷過海嘯之後我覺得冇嘢係老土，親人最重要，我唔介意老土啲。」
杜汶澤更已作好生兒育女的準備，他說：「我以前好憎細路，覺得呢個世界冇嘢好，根本就唔適合細路仔生存，但𠵱家就唔係咁睇，無論乜嘢事都會有好嘅一面。我𠵱家都想生，會同醫生傾吓，做吓婚前檢查。」
昨日杜汶澤接受商台訪問時，笑言希望有人贊助酒席，譬如老闆林建岳或俞琤，他說：「咁大家照做人情，扣除開支嘅錢可以捐去慈善機構。」問杜汶澤會否叫劉德華捐幾圍酒席？他說：「佢呢排咁開心，唔好搞佢啦。」
杜汶澤又透露老闆林建岳會負責替他擇日完婚，林建岳昨日接受本報電話訪問時，除恭喜阿澤外，他又說：「我今日收到阿澤嘅電話，都恭喜佢，我梗係搵師傅白龍王幫佢擇啦。贊助酒席呢啲嘢小事嚟啫，到時再傾啦！」
而華仔其後亦接受查小欣訪問，問到他會否送幾圍給杜汶澤時，華仔說：「有乜所謂？咁高興。」問到華仔會否同樣因天災症候群而打算結婚？他說：「唔諗呢樣嘢，佢儍仔嚟㗎，唔好因為咁樣而結婚，佢係咪真係愛佢㗎？不過田蕊妮咁可愛，值得愛嘅。」
採訪：張止寒
