日韓興啲乜:<br>新興湯炒拉麵每日限賣30碗

日韓興啲乜:
新興湯炒拉麵每日限賣30碗

日式放湯拉麵大家食得多,加風味醬汁的乾炒拉麵亦唔少人試過,但日本最新興的「湯炒拉麵」你又試過未?這新式拉麵既有乾炒的鑊氣,又有湯麵的濃汁,兩種口感集一身,好味到㗎仔㗎妹排隊爭住食,皆因這關西大阪最新話題麵食,每日限賣30碗咁大把。

記者、攝影:張一豪

新興話題拉麵

關西大阪最近流行一種名叫「Yakiramen」的「湯炒拉麵」,這新口味發源自以豬骨湯拉麵聞名於世的九州。九州最出名的是博多白湯拉麵,當地拉麵店除菜牌上的拉麵外,總留兩手招待熟客,其中就有種叫「湯炒拉麵」的做法,先用中國鑊炒熟拉麵,再在鑊氣四溢的拉麵上燴以香濃骨湯,而配料就自由配搭,可以是日式叉燒、蔬菜,總之炒起來好吃就可以,九州人喜歡用來餸啤酒。
「豚一」店主宮西敦士,在大阪賣正宗久留米豬骨湯拉麵12年,為搞新意思新推出兩款拉麵,就是博多的「湯炒拉麵」和豬骨湯麵加強版「豚一拉麵」,前者多了一份普通湯麵沒有的濃香,鑊氣把葱花香味逼出,十分惹味;後者湯汁加了魚乾來熬,骨湯味濃極鮮甜,食完麵記得飲埋啖湯。這兩款人氣麵食不但有當地名DJ簽名支持力撐、雜誌《KansaiWalker》作專題報道,更得到《Kansai一週間》的「關西拉麵新人賞」。

■店主宮西敦士得「關西拉麵新人賞」,威威!

■賣晒明天請早!湯炒拉麵約$49

■加入即磨芝麻、紅薑絲等配料,令人更開胃。

■枱面擺滿最近採訪過店舖的雜誌,可知「豚一」幾受歡迎。

■大阪「每日放送台」名DJ牛切章夫簽名力撐。

湯炒拉麵製作過程

製作方法比一般拉麵繁複,先把拉麵放水輕輕淥一淥,兜起再起鑊炒,又要爆炒配料,所需時間幾乎是一般湯麵的一倍有多。

■輕輕淥開拉麵,蒜頭切片,叉燒切粒,木耳切條、方便爆炒。

■燒熱油,先把蒜片爆出香味,然後加叉燒、木耳條再下麵條猛火急炒至乾身。

■猛火加入濃湯,讓麵條吸收鮮香湯汁,令麵條稍稍變軟更美味。

■猛火令湯汁略變稠後,就加葱花上碟即成,老實講賣相一般,但勁好味。

早賣完早關門

「豚一」每日分早晚兩個時段開放,早場中午12時開始已坐滿人,要等位,晚場晚上7時過後座無虛席,最近因為傳媒效應,顧客更多,有時會旺到無貨賣而被迫提早關門。為令客人日日吃到新鮮靚麵,宮西敦士堅持每日預夠數就算,為保持「湯炒拉麵」質素,寧可每日限賣30碗,也不願粗製濫造,很多客人一試難忘。

■店內座位不多,中午12時已逼爆場,要等位。

■人氣拉麵火速上位,但製作麻煩,故日限賣30碗。

美味秘密大公開

成功食店通常不會透露任何原材料秘密,難得宮西敦士毫不吝嗇,把製作美味拉麵的秘密一一道出。

彈牙靚麵
■其他食店為減低成本會用加拿大、澳洲等平價小麥粉製麵,「豚一」指定要日本國產小麥,做出來的麵身金黃色,煙韌彈牙。

鮮味魚乾
■宮西敦士加入鯖魚乾熬上湯汁,湯底多一份鮮味。

久留米產豉油
■香港廚神梁文韜對「頭抽」十分推崇,而宮西就堅持要用上等的久留米醬油,才可帶出湯底的香濃。

千年化骨水
■湯底用鹿兒島黑豚骨熬製,左邊一鍋是每日熬製的普通骨湯,另一鍋則由開店煲到現在、12年不停加入新骨頭去熬煮的「千年化骨水」,麵湯靈魂從此來。

食客幾句

市田有紀子:「我就讀嗰間美容學校喺附近,睇到雜誌介紹過嚟試試,好掂!」

松岡先生:「早幾日先第一次試,一食上癮,我下星期一定再嚟。」

高橋先生:「我係熟客仔,唔係次次都點『湯炒拉麵』,唔係唔鍾意,而係想留番啲畀新客人試試。」

久留米拉麵豚一
地址;日本大阪市北區中崎町2-1-1
電話:(81)6-6993-0391
營業時間: 早場11:30am至1:30pm
晚場6:00pm至1:00am
交通:天王寺站乘地下鐵谷町線,中崎町站下車,出2號出口徒步2分鐘直達。
註:以上價錢為外幣兌換約數,?100兌$7.5。