韓國靚仔元斌啱啱喺噚日中午飛抵台灣，宣傳即將上映嘅電影《來不及對你說》。元斌喺台灣前前後後只係逗留咗二十小時，並喺今日朝早再飛往新加坡繼續宣傳。
過去曾經放過台灣fans兩次飛機嘅元斌，喺噚日中午首次飛抵台灣，宣傳即將喺當地上映嘅電影。當日有唔少女fans一早湧到機場等候，點知頭戴黑色冷帽嘅元斌，喺保安重重包圍之下，冇乜同fans打招呼就匆匆離去。之後元斌又出席咗電影記者會同埋晚上舉行嘅慈善首映禮。
雖然元斌今次喺台灣逗留二十個鐘，但同行嘅重有佢嘅經理人同化妝師共十二人，一齊入住台北六福皇宮嘅總統套房。據知荷李活女星雲妮絲惠嘉（ReneeZellweger）上月到台灣宣傳時，都曾經入住過嗰間總統套房。
酒店個經理重特登送畀元斌一個台灣過年禮盒俾佢作為手信，裏面有一個蒜味蘿蔔糕同竽頭糕，畀元斌提早品嘗一吓台灣過年食品嘅味道喎。
