噚日教院搞咗個反削資集會，身為教育界前輩嘅「華叔」司徒華，親自到教院支持啲學弟學妹（華叔係教院前身之一嘅葛量洪師範學院第一屆畢業生），重以佢七三年發動學界大罷課經驗，教佢哋點令政府屈服。
華叔話七十年代初政府要降低文憑教師嘅入職薪級點，佢同一班教育界同工擔心咁會令高質素嘅人唔願入行，於是反對。佢哋喺七三年嘅四月四日（兒童節）、四月十三日（黑色星期五）、五月四日同五日發動罷課，其中最後兩日係小學生考升中試日子，政府知驚，惟有投降。
佢教班教院學生要識得硬着頭皮頂硬上，將計劃逐步升級，捉住敵人致命點作最後攻擊，又要爭取大人物支持，佢當年就搵到營辦香港七成學校嘅天主教香港教區、聖公會同中華基督教會領袖支持。不過𠵱家時移世易，教育界亞瑟王李國章大晒，真係今時唔同往日囉。
（圖）華叔叫學生要捉住政府致命點作攻擊，先可以爭取成功。
傳真︰2623-9278
電郵︰